फ्रान्सका चर्चित फुटबल खेलाडी किलियन एम्बाप्पेसँग जोडिएको एउटा प्रसंगले चीनमा ठूलो विवाद निम्त्याएको छ। चीनका पूर्वनेता माओत्सेतुङबारे उनले कथित रूपमा गरेको टिप्पणीपछि त्यहाँ विरोध चुलिएको हो। त्यसपछि चीनका ठूला कम्पनीहरूले उनलाई आफ्ना प्रचार अभियानबाट हटाउन थालेका छन्।
फ्रान्सेली टक शो ‘द ब्रिज’ मा कुराकानी गर्दा एम्बाप्पेले आफूलाई सबैभन्दा धेरै हँसाउने मेमबारे चर्चा गरेका थिए। उक्त कुराकानीमा ‘चिनियाँ तानाशाह’ जस्तो देखिने व्यक्तिको भिडियोको उल्लेख भएको बताइएको छ। उक्त मेममा माओत्सेतुङसँग मिल्दोजुल्दो तस्बिरमा एम्बाप्पेको अनुहार राखिएको थियो। तर, उनले माओको नाम लिएका थिएनन्। सार्वजनिक भइरहेका भिडियो क्लिपको आधिकारिक पुष्टि भने भएको छैन।
चिनियाँ विदेश मन्त्रालयका प्रवक्ता लिन जियानले चिनियाँ जनताको भावनामा चोट पुर्याउने अभिव्यक्ति र व्यवहारको समाजका विभिन्न क्षेत्रबाट विरोध हुने बताएका छन्। चीनको ठूलो दुग्ध उत्पादक कम्पनी मेङनिउ र पेय पदार्थ निर्माता डोङपेङले राष्ट्रिय भावनामा चोट पुर्याउने गतिविधिप्रति शून्य सहनशीलता अपनाउने बताएका छन्। तर, उनीहरूले एम्बाप्पेसँगको सम्झौता अन्त्य गर्नुको स्पष्ट कारण उल्लेख गरेका छैनन्।
चिनियाँ सञ्चारमाध्यमका अनुसार सरकारी प्रसारण संस्था सीसीटीभीले स्पेनिस ला लिगाका खेल प्रसारण स्थगित गरेको छ। सीसीटीभीको समाचार एपबाट एम्बाप्पेसम्बन्धी सामग्री हटाइएको पनि बताइएको छ। एम्बाप्पे चीनमा लोकप्रिय छन् र विभिन्न ब्रान्डसँग उनको व्यावसायिक सम्झौता छ। विवादबारे उनले वा ‘द ब्रिज’ कार्यक्रमले अहिलेसम्म कुनै प्रतिक्रिया दिएका छैनन्।
