झापाको मेचीनगर नगरपालिकाले अनुमतिपत्र नलिई अस्पताल, क्लिनिक र प्रयोगशाला सञ्चालन गर्ने १३ वटा संस्थामाथि कारबाही गरेको छ। नगरपालिकाको नेतृत्वमा जिल्ला प्रशासन कार्यालय, स्वास्थ्य कार्यालय र उपभोक्ता जागरण अभियान नेपाल सम्मिलित टोलीले चारआली, धुलाबारी, इट्टाभट्टा र काँकडभिट्टा क्षेत्रमा रहेका दुई दर्जनभन्दा बढी अस्पताल, क्लिनिक र फार्मेसीको अनुगमन गरेको थियो।
अनुगमनका क्रममा कागजात नभेटिएका दुई संस्थामा शिलबन्दी गरिएको छ। मेचीनगर–१३ चारआलीको मनकामना अस्पताल र मेचीनगर–१० धुलाबारीको सामुदायिक स्वास्थ्य सेवा प्रालिलाई जनही दुई लाख ५० हजार रुपैयाँ जरिवाना गरिएको प्रमुख प्रशासकीय अधिकृत सुवास श्रेष्ठले जानकारी दिए। अनुमतिविना प्रयोगशाला चलाएका शिखर अस्पताल प्रालिसहित ११ वटा अस्पताल, क्लिनिक र फार्मेसीलाई जनही ७५ हजार रुपैयाँ जरिवाना गरिएको छ।
जरिवाना तिरिएका संस्थामा प्रतिमा जमूना मेडिकल, न्यूमिलन मेडिकल हल, रोहन मेडिकल, दिव्यांशी मेडिकल, बरुनाभ मेडिकल, भरोसा मेडिकल, काँकडभिट्टा आइकेयर सेन्टर, तेजस्वी मेडिकल, रस्मिका फार्मेसी र जीवन रक्षा मेडिकल छन्।
चलेका क्लिनिक र अस्पतालमै अनुमतिविना प्रयोगशाला सञ्चालन हुनु गम्भीर लापरबाही भएको अनुगमन टोलीका सदस्य अर्जुन कार्कीले बताए। स्वास्थ्यजस्तो संवेदनशील सेवामा गल्ती गर्नेलाई छुट दिन नहुने उनको भनाइ छ। स्वास्थ्य शाखा प्रमुख सविता सापकोटाका अनुसार जरिवाना बुझाएर इजाजतपत्र अद्यावधिक गरेपछि मात्र शिलबन्दी खोलिनेछ।
