एभरेष्ट पेपर मिल्स प्रा.लि.का १७४ जना श्रमिकले आफूले पाउनुपर्ने सेवा सुविधाबापत कुल ६ करोड ३६ लाख ६२ हजार ८०३ रुपैयाँ ३८ पैसा प्राप्त गरेका छन्। लामो कानुनी र प्रशासनिक प्रक्रियापछि श्रमिकहरूले बक्यौता रकम पाएका हुन्।
उद्योग प्रशासन र श्रमिकबीच विवाद चुलिएपछि श्रमिकहरूले सेवा सुविधा र पारिश्रमिकको माग गर्दै कानुनी बाटो रोजेका थिए। श्रम अदालतको आदेश र जिल्ला प्रशासन कार्यालय धनुषामा भएको सहमतिका आधारमा सबै श्रमिकलाई विभिन्न चेकमार्फत बक्यौता रकम दिइएको हो।
श्रम अदालतले २०८२ चैत १७ गते ५ करोड ८६ लाख ६० हजार ३९५ रुपैयाँ २२ पैसा भुक्तानी गर्न बैङ्क खाता फुकुवा गर्न आदेश दिएको थियो। खाता फुकुवा भए पनि प्रतिष्ठानले रकम नदिएपछि श्रमिकहरूले अदालतको अवहेलना भएको भन्दै फेरि निवेदन दिएका थिए। त्यसपछि २०८३ भदौ २६ गते सेयरधनीहरूको बैङ्क खाता, सम्पत्ति र सेयरसमेत रोक्का गरिएको थियो।
अन्ततः असोज ३० गते अदालतको आदेशबमोजिमको रकमसँगै भदौ र असोज महिनाको तलबसमेत जोडेर कुल रकम भुक्तानी गरिएको छ। विभिन्न चेकमार्फत रकम हस्तान्तरण भएसँगै लामो समयदेखि रोकिएको सहमति र अदालतको निर्णय पूर्ण रूपमा कार्यान्वयनमा आएको छ।
