अमेरिकाको भर्जिनियामा श्रीमती बेपत्ता भएको मुद्दामा श्रीमान्विरुद्धको सुनुवाइ चौथो हप्तामा पुगेको छ। मनासस पार्कमा बस्ने नरेश भट्टमाथि श्रीमती ममता काफ्ले भट्टको हत्या गरेको आरोप छ, तर उनको शव अहिलेसम्म फेला परेको छैन। नरेशले सबै आरोप अस्वीकार गर्दै आफू निर्दोष रहेको बताएका छन्।
सुनुवाइमा अहिलेसम्म ५६ जना साक्षीको बयान भइसकेको छ। अभियोजन पक्षले घरभित्र भेटिएका रगतजस्ता दाग, निगरानी क्यामेराका दृश्य र फोहोरका झोला फालिएको भनिएको भिडियो अदालतमा पेस गरेको छ। सोमबार बयान दिने अनुसन्धानकर्ताहरूले सन् २०२४ को अगस्टमा चान्टिलीको ग्यास स्टेसनबाहिरका दानपेटिकाबाट कपडा, जुत्ता र बाथ म्याटसहितका झोला बरामद भएको बताए। घरको खानतलासीमा फोहोर फाल्ने भाँडोमा गरिएको प्रारम्भिक रगत परीक्षणमा नीलो चमक देखिएको थियो, तर अनुसन्धानकर्ताले नै उक्त परीक्षणले मात्र रगत भएको निश्चित नहुने स्वीकार गरे।
अर्का अनुसन्धानकर्ताले घरबाट हरियो रङको करौँती बरामद भएको र त्यसमा रातो-खैरो दाग तथा कपालजस्ता रेशा भेटिएको बताए। उक्त करौँती सन् २०२४ को जुन २ मा फेयरफ्याक्सको पसलबाट खरिद गरिएको थियो। पानीको खपतसम्बन्धी विवरणमा ३१ जुलाई २०२४ मा दुई घण्टामा करिब १६० ग्यालन पानी प्रयोग भएको देखिएको छ, जुन सामान्यभन्दा धेरै हो।
साथीहरूले दम्पतीबीच वैवाहिक समस्या रहेको बताए। ममतालाई अन्तिम पटक २९ जुलाई २०२४ मा भिडियो कलमा देखिएको थियो। मुद्दा प्रिन्स विलियम काउन्टीमा न्यायाधीश किम्बर्ली इरभिङको इजलासमा चलिरहेको छ।
