मस्कोको एक सैन्य अदालतले युक्रेनी पक्षलाई आर्थिक सहयोग गरेको आरोपमा एक पूर्व आईटी निर्देशकलाई १३ वर्षको जेल सजाय सुनाएको छ। अदालतले उनलाई ‘आतङ्कवाद’लाई आर्थिक सहायता दिएको ठहर गरेको छ।
दोस्रो पश्चिमी जिल्ला सैन्य अदालतले सोमबार ४९ वर्षीय युरी बेलेन्कीलाई दोषी ठहर गर्दै पहिलो तीन वर्ष साधारण जेल र त्यसपछिका १० वर्ष कडा खालको कारागारमा बिताउनुपर्ने फैसला गरेको हो। सरकारी वकिलहरूले १४ वर्षको सजाय मागेका थिए। अदालतले ५ लाख रुबल (करिब ६ हजार ३ सय अमेरिकी डलर) जरिवानासमेत तोकेको छ।
रुसी सरकारी समाचार संस्था तासका अनुसार बेलेन्की ‘डीहाउस’ नामक कम्पनीका पूर्व आईटी निर्देशक हुन्। उनीमाथि अगस्ट २०२२ देखि मार्च २०२४ का बीचमा १५ पटक क्रिप्टोकरेन्सी पठाएर युक्रेनको सशस्त्र बल र रुसले ‘आतङ्ककारी’ घोषणा गरेको आजोभ बटालियनलाई १ लाख २० हजार रुबलभन्दा बढी (करिब १ हजार ५ सय डलर) सहयोग गरेको आरोप छ।
मुद्दामा क्रिप्टोकरेन्सी एक्सचेन्ज बाइनान्सले उपलब्ध गराएको कारोबार विवरण मुख्य प्रमाण बनेको बताइएको छ। अधिकारवादी संस्था ‘फर्स्ट डिपार्टमेन्ट’का वकिल येभगेनी स्मिरनोभले बाइनान्सको जवाफ नै मुद्दाको मुख्य प्रमाण बनेको बताए। तर प्रतिरक्षा पक्षले उक्त विवरण साँच्चै बाइनान्सबाटै आएको हो वा होइन भन्नेमा प्रश्न उठाएको छ।
बुल्गेरियाको आवासीय अनुमतिपत्र रहेका बेलेन्कीलाई गत वर्षको सेप्टेम्बरमा मस्को भ्रमणका क्रममा नियन्त्रणमा लिइएको थियो। उनले आरोप अस्वीकार गरेका छन् र उनका वकिलले फैसलाविरुद्ध अपिल गर्ने बताएका छन्। ‘फर्स्ट डिपार्टमेन्ट’को प्रतिवेदनअनुसार सन् २०२५ मा रुसमा दायर भएका देशद्रोह र जासुसीसम्बन्धी आरोपमध्ये करिब १० प्रतिशत युक्रेनी सङ्गठनहरूलाई दिइएको चन्दासँग सम्बन्धित छन्।
