लन्डन — बेलायतमा पढ्न जाने अन्तर्राष्ट्रिय विद्यार्थीले ३० नोभेम्बरदेखि जीवनयापनका लागि पहिलेभन्दा धेरै रकम देखाउनुपर्ने भएको छ। बेलायतको गृह मन्त्रालयले विद्यार्थी भिजाका लागि तोकिएको आर्थिक मापदण्ड बढाउन लागेको हो। यो रकम विश्वविद्यालयको शुल्कबाहेकको खर्च हो।
नयाँ व्यवस्थाअनुसार लन्डनमा पढ्ने विद्यार्थीले हरेक महिनाका लागि १ हजार ५ सय ७० पाउन्ड देखाउनुपर्नेछ। हाल यो रकम १ हजार ५ सय २९ पाउन्ड छ। नौ महिना वा सोभन्दा लामो पाठ्यक्रमका लागि चाहिने अधिकतम रकम १३ हजार ७ सय ६१ पाउन्डबाट बढेर १४ हजार १ सय ३० पाउन्ड पुग्नेछ।
लन्डनबाहिर पढ्ने विद्यार्थीका लागि मासिक मापदण्ड १ हजार १ सय ७१ पाउन्डबाट बढेर १ हजार २ सय ३ पाउन्ड हुनेछ। नौ महिनाका लागि चाहिने अधिकतम रकम पनि १० हजार ५ सय ३९ पाउन्डबाट बढेर १० हजार ८ सय २७ पाउन्ड पुग्नेछ। भिजा आवेदन शुल्क र स्वास्थ्य सेवा शुल्क छुट्टै तिर्नुपर्ने कानुन व्यवसायीहरूले बताएका छन्।
तथ्याङ्कअनुसार सन् २०२४–२५ मा बेलायतका उच्च शिक्षा संस्थामा ६ लाख ८५ हजार ५ सय ६५ विदेशी विद्यार्थी अध्ययनरत थिए। यो कुल विद्यार्थीको २४ प्रतिशत हो।
चेस्टर विश्वविद्यालयका प्राध्यापक पदम सिम्खडाका अनुसार सन् २०२१–२२ मा अन्तर्राष्ट्रिय विद्यार्थीले बेलायती अर्थतन्त्रमा ४१ दशमलव ९ अर्ब पाउन्ड योगदान गरेका थिए। भारत, चीन, पाकिस्तान र नाइजेरियापछि नेपाल बेलायतमा विद्यार्थी पठाउने पाँचौँ ठूलो मुलुक बनेको उनले बताए। सन् २०२५ डिसेम्बरसम्मको एक वर्षमा १९ हजार ५ सय ५३ नेपाली विद्यार्थीले अध्ययन भिजा पाएका थिए।
रोह्याम्पटन विश्वविद्यालयमा स्नातक पढिरहेकी सृष्टि बोहोराले बेलायतमा काम पाउन निकै कठिन रहेको बताइन्। सातामा २० घण्टा काम गरेर खाना र कोठाभाडा धान्न पनि नपुग्ने उनको भनाइ छ। विश्वविद्यालयको शुल्क नेपालमा ऋण खोजेर तिरिरहेको उनले बताइन्।
