बुधबार बिहान चक्रवात अर्नब भारतको आन्ध्र प्रदेशको तटीय क्षेत्रमा पुग्यो। त्यसपछि तटीय बस्तीमा तीव्र हावा र मुसलधारे वर्षा सुरु भयो, र जनजीवन अस्तव्यस्त बन्यो। आँधी आउनुअघि नै कम्तीमा ८९ हजार मानिसलाई सुरक्षित ठाउँमा सारिएको थियो।
राज्य विपद् व्यवस्थापन प्राधिकरणका प्रमुख प्रखर जैनले तटमा आइपुग्नुअघि आँधी केही कमजोर भए पनि हावाको उच्चतम गति प्रतिघण्टा १८५ किलोमिटरसम्म पुगेको बताए। आन्ध्र प्रदेशका विभिन्न तटीय जिल्लामा भारीदेखि अति भारी वर्षा भयो। आँधी भित्री भूभागतर्फ अघि बढ्दै जाँदा अझ कमजोर हुने र भोलिपल्ट हावाको गति प्रतिघण्टा ११० किलोमिटरसम्म झर्ने अनुमान छ। अहिलेसम्म मानवीय क्षतिको विवरण प्राप्त भएको छैन।
भारतीय मौसम विभागले आन्ध्र प्रदेशको तट र छिमेकी ओडिसाका केही भागमा आगामी चार घण्टासम्म भारी वर्षा र तीव्र हावा जारी रहने जनाएको छ। विभागका प्रमुख मृत्युञ्जय महापात्रले आँधीको अग्रभाग जमिनमा प्रवेश गरिसकेको र तट पार गर्ने प्रक्रिया पूरा हुन करिब चार घण्टा लाग्ने बताए। मंगलबार अबेर अर्नब अत्यन्त शक्तिशाली आँधीमा परिणत भएको थियो, र बंगालको खाडीमा तीव्र बनेपछि त्यसको बाहिरी भागले मंगलबार रातिदेखि नै आन्ध्र तटमा असर पार्न थालेको थियो।
जोखिमलाई ध्यानमा राखेर अधिकारीहरूले मंगलबार नै सबै तटीय जिल्लालाई उच्च सतर्कतामा राखेका थिए। तल्लो भूभाग र बाढीको जोखिम भएका क्षेत्रका बासिन्दालाई सुरक्षित स्थानमा सार्न थालिएको थियो, र केही ठाउँमा रेल सेवा रद्द गरियो। प्राधिकरणका अनुसार आँधीको सम्भावित मार्गमा एक करोड २० लाखभन्दा बढी मानिस बस्छन्। बीस जिल्लामा दुई हजारभन्दा बढी आश्रयस्थल तयार पारिएका छन्, र लाखौँ बासिन्दाको मोबाइलमा आपत्कालीन चेतावनी पठाइएको छ।
तटीय क्षेत्रमा ३० हजारभन्दा बढी माछा मार्ने डुंगा सुरक्षित राखिएका छन् भने करिब एक हजार १०० स्वास्थ्य टोली परिचालन गरिएको छ। यसैबीच ओडिसाका अधिकारीहरूले प्रभावित हुन सक्ने क्षेत्रका करिब ४८ हजार मानिसलाई सुरक्षित स्थानमा सार्ने योजना बनाएका छन्।
