असोजको दोस्रो सातामा परेको लगातारको वर्षापछि कालीगण्डकी नदीमा आएको बाढी र पहिरोले म्याग्दी, पर्वत, बागलुङ र मुस्ताङमा ठूलो क्षति पुर्याएको छ। नदी किनारका बस्ती, सडक र खेतबारीमा क्षति पुग्दा सयौँ परिवार विस्थापित भएका छन्।
म्याग्दीमा सात जनाको ज्यान गएको छ भने दुई जना अझै बेपत्ता छन्। प्रमुख जिल्ला अधिकारी गणेश गैरेका अनुसार १११ घर पूर्ण रूपमा भत्किएका छन्, ९३ घरमा आंशिक क्षति पुगेको छ र ३४२ घर पहिरोको उच्च जोखिममा छन्। अन्नपूर्ण गाउँपालिकाका बस्तीबाट दुई सय ५० जनाभन्दा बढी विस्थापित भएका छन्।
असोज ८ देखि ११ गतेसम्म बेनीमा २९९ मिलिमिटर, बेगमा २५१ दशमलव ७ मिलिमिटर र रातोपानीमा २३६ मिलिमिटर वर्षा भएको थियो। तर अधिकारीहरू वर्षा मात्रै कारण नभएको बताउँछन्। भू तथा जलाधार व्यवस्थापन कार्यालय पर्वतका प्रमुख शम्भुकुमार मिश्रका अनुसार अव्यवस्थित सडक निर्माण, भलपानीको निकास नहुनु र नदीजन्य पदार्थको अनियन्त्रित उत्खननले जोखिम बढाएको हो।
सडकमा ८० करोड रुपैयाँभन्दा बढीको क्षति भएको छ र पुनर्निर्माणमा तीन अर्ब ५० करोडदेखि चार अर्ब रुपैयाँसम्म लाग्ने अनुमान छ। बेनी–घाँसा खण्डको ३३ किलोमिटरमध्ये नौ किलोमिटर सडक बगेको छ। बाढीले २२० केभी लाइनका तीन टावर ढालेपछि करिब १७५ मेगावाट विद्युत् २० दिनसम्म राष्ट्रिय प्रणालीमा जोडिन सकेन। आपत्कालीन टावरपछि २१ दिनमा आपूर्ति फर्किएको थियो।
कालीगण्डकीमा २४६ मेगावाटका दुई र म्याग्दीमा २०३ दशमलव ५ मेगावाटका पाँच जलविद्युत् आयोजना निर्माणाधीन छन्। स्थानीयवासीले सुरुङको माटो जथाभावी थुपारिँदा नदीको धार बदलिएको गुनासो गरेका छन्। जलजलाको फर्सेमा ७५ घर पूर्ण रूपमा क्षति भएका छन्। गण्डकी प्रदेशसभा सदस्य रेशमबहादुर जुग्जालीले जोखिमयुक्त क्षेत्रको पहिचान र नदी दोहन नियन्त्रणलाई प्राथमिकता दिनुपर्ने बताएका छन्।
