राष्ट्रिय स्वतन्त्र पार्टीको गाउँपालिका अध्यक्ष बन्ने चाहना राख्नेहरूको सूचीमा गण्डकी प्रदेशमा गोरखा जिल्ला सबैभन्दा अगाडि देखिएको छ। पार्टीको ‘गाउँपालिका क्यान्डिडेड क्लब’ मा अनलाइन आवेदन दिनेहरूको विवरणअनुसार गण्डकीमा हालसम्म १९७ जनाले अध्यक्ष पदका लागि इच्छा देखाएका छन्।
जिल्लागत विवरणमा गोरखाबाट ४१, स्याङ्जाबाट ३२ र कास्कीबाट ३१ जनाले आवेदन दिएका छन्। तनहुँ र पर्वतबाट २३–२३, बागलुङबाट १६, नवलपुरबाट १४, लमजुङबाट ११ र म्याग्दीबाट ६ जनाले अध्यक्ष बन्ने आकांक्षा राखेका छन्। गण्डकीमा जम्मा ५८ वटा गाउँपालिका छन्।
म्याग्दीका पाँच गाउँपालिकामध्ये धवलागिरी, मंगला र रघुगंगाबाट दुई–दुई जनाले आवेदन दिएका छन् भने अन्नपूर्ण र मालिकाबाट कसैले इच्छा देखाएका छैनन्।
यसैबीच मुस्ताङ र मनाङबाट भने अध्यक्ष पदका लागि अहिलेसम्म एउटा पनि आवेदन परेको छैन। मुस्ताङमा पाँच र मनाङमा चार गाउँपालिका छन्। गण्डकी सभापति नविन त्रिपाठीका अनुसार ती दुई जिल्लामा पार्टीको संगठन निर्माणकै चरणमा रहेकाले आकांक्षी देखिएका छैनन्।
रास्वपाले भदौ १ गतेदेखि गाउँपालिका र असोज २९ गतेदेखि नगरपालिकाका जनप्रतिनिधि बन्न इच्छुकहरूका लागि आवेदन खुला गरेको थियो। अध्यक्ष पदमा उल्लेख्य चासो देखिए पनि उपाध्यक्ष र सदस्य पदमा भने आवेदन कम परेको पार्टीले जनाएको छ। आवेदन दिने समय सीमा अहिलेसम्म तोकिएको छैन।
