नेपाली कांग्रेसको १५औँ महाधिवेशनबाट निर्वाचित केन्द्रीय कार्यसमितिका पदाधिकारी तथा सदस्यहरूको शपथ ग्रहण बिहीबार दिउँसो २ बजे सानेपास्थित केन्द्रीय कार्यालयमा हुँदैछ। निर्वाचन समितिको उपस्थितिमा सभापति गगन थापाले पदाधिकारी र सदस्यहरूलाई शपथ दिलाउनेछन्।
गत असोज १८ देखि २३ गतेसम्म भएको महाधिवेशनबाट थापाको नेतृत्वमा २३१ सदस्यीय केन्द्रीय कार्यसमिति चयन भएको थियो। विधानमा २९७ सदस्यीय कार्यसमितिको व्यवस्था छ र बाँकी ६६ जना सभापतिले मनोनीत गर्ने व्यवस्था छ। सभापति थापाले असोज ३१ गते नै शपथ लिइसकेका छन्। केन्द्रीय सदस्यमा निर्वाचित विनीता खड्कालाई प्रमाणपत्र नदिने निर्णय भएकाले बिहीबार २२९ जनाले शपथ लिनेछन्।
शपथलगत्तै अनौपचारिक केन्द्रीय कार्यसमिति बैठक बस्ने तयारी छ। नवनिर्वाचित सहमहामन्त्री प्रकाश रसाइली स्नेहीले शपथलगत्तै अनौपचारिक बैठक बस्ने जानकारी दिएका छन्। तर औपचारिक बैठक भने सभापतिले मनोनयन गर्न पाउने सदस्यहरूको पहिलो चरणको मनोनयनपछि मात्र बस्नेछ। सभापतिले ६६ केन्द्रीय सदस्यसहित चार सहमहामन्त्री र एक कोषाध्यक्ष पनि मनोनीत गर्न पाउँछन्। मनोनीत हुने व्यक्ति केन्द्रीय सदस्य हुनुपर्ने व्यवस्था विधान संशोधनबाट गरिएको छ, तर संशोधित विधान अझै सार्वजनिक भएको छैन।
पहिलो चरणमा निर्वाचनमा भाग नलिएका वरिष्ठ नेताहरूलाई केन्द्रीय समितिमा ल्याउने तयारी छ। छलफलमा रहेका नाममा ज्ञानेन्द्रबहादुर कार्की, रमेश रिजाल, राजन केसी, चिनकाजी श्रेष्ठ, मीन विश्वकर्मा, देवराज चालिसे, सुधीर सिवाकोटी, सुजाता कोइराला, दिलेन्द्रप्रसाद बडू, भरतबहादुर खड्का र ईश्वरी न्यौपाने छन्। कार्की महाधिवेशनमा उपसभापति वा महामन्त्रीका दाबेदार थिए तर अन्तिममा कुनै पदमा उम्मेदवारी दिएनन्। सभापतिमा प्रतिस्पर्धा गरेका श्यामकृष्ण खड्की र संसदीय दलका नेता भीष्मराज आङ्देम्बेसहित सात प्रदेश सभापति भने पदेन केन्द्रीय सदस्य हुनेछन्।
