अमेरिकी गायक नील यङले राष्ट्रपति डोनाल्ड ट्रम्पको राजनीतिक कार्यसमितिविरुद्ध अदालतमा मुद्दा दायर गरेका छन्। सोमबार दायर गरिएको मुद्दामा ट्रम्प ४७ कमिटी इन्कलाई १० मिलियन डलर क्षतिपूर्ति तिर्न माग गरिएको छ।
मुद्दाको केन्द्रमा अक्टोबर १२ मा ओहायोको यंग्सटाउनमा भएको मध्यावधि चुनावी र्याली छ। भर्जिनियामा दायर गरिएको मुद्दामा भनिएको छ, ट्रम्प मञ्चमा आउने बेलामा समितिले यङको चर्चित गीत ‘रकिन इन द फ्री वर्ल्ड’ बजाएको थियो।
यङका अनुसार कुनै पनि सार्वजनिक कार्यक्रममा गीत बजाउन अनुमतिपत्र आवश्यक पर्छ, तर आफूले समितिलाई त्यस्तो अनुमति नदिएको र भविष्यमा दिने मनसायसमेत नरहेको उनको भनाइ छ। ट्रम्पलाई यो कुरा थाहा हुँदाहुँदै पनि गीत प्रयोग गरिएको मुद्दामा उल्लेख छ।
यो ट्रम्पविरुद्ध यङले चाल्नुभएको दोस्रो कानुनी कदम हो। उनले सन् २०२० मा पनि यस्तै मुद्दा दायर गरेका थिए, जुन पछि आपसी सहमतिबाट टुंगिएको थियो। नयाँ मुद्दामा अघिल्लो सहमतिका सर्त उल्लङ्घन गर्दै उही गीत फेरि बजाइएको दाबी गरिएको छ।
मुद्दामा सन् १९८९ मा सार्वजनिक भएको उक्त गीतले अमेरिकी राजनीतिक भाषणका खोक्रा वाचा र गरिब, घरबारविहीन तथा पछाडि पारिएका मानिसहरूको कठिन जीवनबीचको दूरी देखाउने उल्लेख छ। गीतको कोरसले सबैले समान स्वतन्त्रता नपाएको तीतो वास्तविकतालाई व्यङ्ग्य गर्ने र गीतले ट्रम्पले प्रतिनिधित्व गर्ने विचारको विपरीत सन्देश दिने दाबी पनि मुद्दामा गरिएको छ।
