जोर्डनको वायुसेनाले दक्षिणी सिरियामा रहेका सशस्त्र समूहका ठेगानामा हवाई आक्रमण गरेको छ। जोर्डनका अनुसार यो कारबाही अक्टोबर २३ मा कराकस्थित ग्रीक अर्थोडक्स चर्चमा भएको आक्रमणको जवाफ हो। उक्त आक्रमणमा नौ जनाको ज्यान गएको थियो र त्यसको जिम्मेवारी इस्लामिक स्टेट समूहले लिएको थियो।
जोर्डनको सशस्त्र बलले सामाजिक सञ्जाल एक्समार्फत लडाकु विमानहरूले दक्षिणपूर्वी सिरियाका कैयौँ ठेगाना ध्वस्त पारेको जनाएको छ। उसका अनुसार कारबाहीमा ती समूहका कैयौँ सदस्य मारिए वा घाइते भए र केही सवारीसाधन पूर्ण रूपमा नष्ट भए। सेनाले यो कारबाही दमास्कससँगको समन्वयमा भएको दाबी गरेको छ। तर सिरियाले उक्त दाबी अस्वीकार गर्दै आक्रमणअघि कुनै जानकारी वा समन्वय नभएको बताएको छ।
सिरियाली अधिकारीहरूका अनुसार आक्रमणपछि चार ठाउँमा उद्धार कार्य चलाइएको छ। डेरा प्रान्तको लाजात क्षेत्रस्थित अल-टाफ गाउँमा एउटा पालमा भएको आक्रमणमा तीन बालबालिका र एक महिलासहित एउटै परिवारका पाँच जनाको मृत्यु भएको छ भने तीन जना घाइते भएका छन्। नासिब नजिकैको अल-शयाह फार्ममा ८० वर्षीय वृद्धको ज्यान गएको छ। उत्तरी सुवायदा ग्रामीण क्षेत्रको शुहाइबमा एक जनाको मृत्यु भएको छ भने मुजायरिबमा लक्षित घरमा कुनै हताहती भएन। सिरियाले मारिएकाहरू सर्वसाधारण भएको आरोप लगाएको छ। यसबारे जोर्डनले तत्काल प्रतिक्रिया दिएको छैन।
आक्रमणलगत्तै सिरियाले जोर्डनसँगको नासिब सीमा नाका बन्द गरेको छ, जुन दुई देशबीच यात्रु र व्यापारिक आवागमनको एक मात्र मार्ग हो। यसैबीच चर्च आक्रमणका आरोपमा दुई दाजुभाइ र उनीहरूका भिनाजुसहित तीन जना पक्राउ परेका छन्। जोर्डनले सन् २०२३ यता सिरियाली भूभागमा लागुऔषध र हतियार तस्करलाई निशाना बनाएको भन्दै कैयौँपटक हवाई आक्रमण गरिसकेको छ।
