रसुवाको उत्तरगया गाउँपालिकामा बाढीले खेतीयोग्य जमिनमा ठूलो क्षति पुर्याएको छ। गाउँपालिकाको वडा नं ४ र ५ का मुख्य धानखेत अहिले बगरमा परिणत भएका छन्। गत भदौ १० गते भोटेकोशी नदीमा आएको विनाशकारी बाढीले ती खेतलाई बालुवा र ढुङ्गाले पुरिदिएको हो।
त्रिशूली नदीको किनारमा रहेका उपल्लो पैरेबेँसी, तल्लो पैरेबेँसी, खाल्टे, नौबिसे, कैदलेटार र बेत्रावतीलगायतका फाँटहरू अति उर्वर मानिन्थे। बाढीसँगै आएको बालुवा र ढुङ्गाले ती फाँट ढाकेपछि खेती गर्न सकिने अवस्था रहेन। वर्षभरि खाने अन्न फल्ने जमिन एकाएक बगर बनेपछि स्थानीय किसानको खाद्य सुरक्षा र जीविकोपार्जनमा गम्भीर सङ्कट उत्पन्न भएको छ।
गाउँपालिका अध्यक्ष माधव अर्यालका अनुसार आकस्मिक बाढीले गाउँपालिकाका मुख्य धान उत्पादन हुने फाँट पुरिएको हो र ठूलो परिमाणको खेतीयोग्य जमिनमा क्षति पुगेको छ। गाउँपालिकाले क्षतिको पूर्ण विवरण सङ्कलन गरिरहेको छ। पीडित किसानलाई तत्काल राहत दिन र उचित क्षतिपूर्तिको व्यवस्था गर्न प्रदेश र सङ्घीय सरकारसँग समन्वय भइरहेको छ।
बाढीका कारण रसुवा जिल्लामा मात्र अनुमानित एक हजार आठ सय छ हेक्टर खेतीयोग्य जमिनमा क्षति पुगेको अनुमान गरिएको छ। धान थन्क्याउने मुख्य सिजनमा खेतीयोग्य जमिन नै सखाप भएपछि पीडित किसान चिन्तित छन्। जमिन बगरमा परिणत भएपछि आगामी सिजनको खेती र परिवारको गुजारा कसरी चलाउने भन्ने प्रश्न उनीहरूका सामु छ।
