जनकपुरधाममा मधेस कृषि विश्वविद्यालय र पिस कोर नेपालबीच कृषि अनुसन्धानलाई व्यवहारमा ल्याउने र आधुनिक प्रविधि किसानसम्म पुर्याउने सहमति भएको छ। मधेस प्रदेशको कृषि विकासलाई अगाडि बढाउने लक्ष्यसहित दुई संस्थाले समझदारीपत्रमा हस्ताक्षर गरेका हुन्।
समझदारीपत्रमा विश्वविद्यालयका उपकुलपति वैद्यनाथ महतो र पिस कोर नेपालका राष्ट्रिय निर्देशक डा किम्याह नजिउल्लाहले हस्ताक्षर गरे। यस सहकार्यबाट अनुसन्धानका नतिजा खेतबारीमा प्रयोग हुने, किसान समुदायमा नयाँ प्रविधिको पहुँच बढ्ने र कृषि उत्पादन तथा उत्पादकत्वमा सुधार आउने अपेक्षा गरिएको छ।
हस्ताक्षर कार्यक्रममा मधेस प्रदेशका अर्थमन्त्री युवराज भट्टराईले जलवायु परिवर्तनको असर थेग्न सक्ने खेती प्रणाली, बाली विविधीकरण, पशुपालन, मत्स्य विकास र खाद्य सुरक्षामा व्यावहारिक अनुसन्धान गर्ने अग्रणी राष्ट्रिय केन्द्रका रूपमा विश्वविद्यालयलाई विकास गर्नुपर्ने बताए। अनुसन्धानबाट प्राप्त ज्ञान किसान र विद्यालयसम्म पुग्नुपर्नेमा जोड दिँदै उनले अनुसन्धान खेतबारीमा लागू भएमा मात्र उत्पादन बढ्ने धारणा राखे।
अर्थमन्त्री भट्टराईले सहकार्य सम्झौतामा मात्र सीमित हुन नहुने बताए। उनका अनुसार यसले कृषि उद्यमशीलता बढाउन, किसान परिवारको आम्दानी सुधार्न, पोषणको अवस्था उकास्न र कृषि क्षेत्रमा युवाको सहभागिता बढाउन सघाउनुपर्छ। सहकार्यको असर अनुसन्धान, उत्पादन वृद्धि, किसानको जीवनस्तर र युवाका लागि उद्यमका अवसरमा देखिनुपर्ने उनको भनाइ थियो।
मधेस प्रदेशको अर्थतन्त्रमा कृषिको ठूलो योगदान रहेकाले अनुसन्धान, आधुनिक प्रविधिको प्रयोग र संस्थागत सहकार्यलाई प्राथमिकता दिनुपर्नेमा उनले जोड दिए। विश्वविद्यालयको प्राज्ञिक क्षमता र पिस कोर नेपालको अनुभवलाई स्थानीय आवश्यकतामा आधारित कार्यक्रममा उपयोग गर्न सके कृषि क्षेत्रको आधुनिकीकरण र प्रदेशको आर्थिक विकासमा योगदान पुग्ने विश्वास गरिएको छ।
