काठमाडौँ — राष्ट्रिय साइबर सुरक्षा केन्द्रले साइबर सुरक्षासम्बन्धी नयाँ सुझाव जारी गरेको छ। नोड डट जेएस रनटाइममा गम्भीर सुरक्षा कमजोरी फेला परेको उल्लेख गर्दै केन्द्रले सम्बन्धित निकायलाई आफ्ना प्रणाली र वेब एप्लिकेसनमा प्रयोग भएको नोड डट जेएसको संस्करण जाँच गरी नयाँ संस्करणमा अद्यावधिक गर्न आग्रह गरेको छ।
केन्द्रका अनुसार कमजोरीको दुरुपयोग भएमा सम्बन्धित प्रणालीमा अनधिकृत पहुँच पुग्न सक्ने, सेवा अवरुद्ध हुन सक्ने र प्रणालीमा चलिरहेका काममा अनधिकृत नियन्त्रण कायम हुन सक्ने जोखिम रहन्छ। त्यसैले जोखिमबाट बच्न आवश्यक सुरक्षा उपाय अपनाउन केन्द्रले अनुरोध गरेको छ।
केन्द्रले अर्को परिपत्र जारी गर्दै सबै वेबसाइटमा वैध एसएसएल/टिएलएस प्रमाणपत्र अनिवार्य रूपमा लागू गर्न निर्देशन दिएको छ। प्रधानमन्त्री तथा मन्त्रिपरिषद्को कार्यालयअन्तर्गतको सूचना प्रविधि तथा विद्युतीय शासन कार्यालय मातहत रहेको केन्द्रले सङ्घीय मन्त्रालय, आयोग, सचिवालय, प्रदेश मन्त्रालय, नगरपालिका सङ्घ र गाउँपालिका महासङ्घलाई पत्र पठाउँदै वेबसाइटको सुरक्षा मापदण्ड लागू गर्न आग्रह गरेको हो।
साइबर जोखिम बढ्दै गएको सन्दर्भमा प्रयोगकर्ताका तथ्याङ्क सुरक्षित रूपमा आदानप्रदान गर्न वेबसाइटमा इन्क्रिप्सन व्यवस्था अनिवार्य गर्नुपर्ने केन्द्रले जनाएको छ। त्यसका लागि टिएलएस १.२ वा टिएलएस १.३ प्रोटोकलसहितको वैध एसएसएल/टिएलएस प्रमाणपत्र प्रयोग गर्नुपर्ने निर्देशनमा उल्लेख छ।
निर्देशनअनुसार सबै सरकारी निकायले आफ्ना वेबसाइटमा प्रयोग भइरहेको प्रमाणपत्रको वैधता तत्काल जाँच गर्नुपर्नेछ। प्रमाणपत्र नभएका वा म्याद सकिएका वेबसाइटमा आधिकारिक तथा विश्वसनीय निकायबाट वैध प्रमाणपत्र लिई जडान र कन्फिगरेसन गर्नुपर्नेछ। वेबसाइट एचटिटिपिएसबाट मात्र सञ्चालन हुने व्यवस्था मिलाउन, पुराना तथा असुरक्षित प्रोटोकल बन्द गर्न र प्रमाणपत्रको म्याद सकिनुअघि नै नियमित नवीकरण गर्न पनि केन्द्रले आग्रह गरेको छ। सरकारी वेबसाइटको सुरक्षा बलियो बनाउँदै नागरिकका व्यक्तिगत विवरण र अन्य संवेदनशील सूचना जोगाउन यस्तो व्यवस्था आवश्यक रहेको केन्द्रले जनाएको छ।
