मौसम पूर्वानुमान महाशाखाका अनुसार अहिले देशमा पश्चिमी वायुको आंशिक असर छ, र बङ्गालको खाडीमा बनेको चक्रवात अर्नबको प्रभाव पनि कायमै छ। यही कारण आज र भोलि देशका धेरै ठाउँमा बादल लाग्ने र वर्षा हुने देखिएको छ।
आज दिउँसो कोशी, मधेस, बागमती र गण्डकी प्रदेशसँगै कर्णाली र सुदूरपश्चिमका हिमाली भागमा प्रायः बादल लाग्नेछ भने अरू ठाउँमा आंशिक बादल रहनेछ। कोशी र बागमतीका हिमाली क्षेत्रका केही ठाउँ तथा अन्य हिमाली भागका थोरै ठाउँमा मध्यम वर्षा र हिमपात हुन सक्छ। मधेससहित कोशी र बागमतीका पहाडी र तराई भागका थोरै ठाउँ तथा गण्डकी, लुम्बिनी, कर्णाली र सुदूरपश्चिमका एक–दुई ठाउँमा पनि मध्यम वर्षाको सम्भावना छ।
आज राति भने वर्षा अझ फैलिने पूर्वानुमान छ। कोशी, मधेस, बागमती, गण्डकी र लुम्बिनी प्रदेशसँगै कर्णाली र सुदूरपश्चिमका हिमाली भागमा धेरैजसो बादल लाग्नेछ। ती प्रदेशका केही ठाउँ तथा कर्णाली र सुदूरपश्चिमका थोरै ठाउँमा चट्याङसहित मध्यम वर्षा र हिमपात हुन सक्छ। कोशी, बागमती र गण्डकीका हिमाली र पहाडी भागका एक–दुई ठाउँमा भारी वर्षा र हिमपातको सम्भावना छ भने लुम्बिनी र गण्डकीका पहाडी र तराई भागका एक–दुई ठाउँमा भारी वर्षा हुन सक्छ।
शुक्रबार देशभर धेरैजसो बादल लाग्नेछ। कोशी, मधेस, बागमती, गण्डकी र लुम्बिनीका धेरैजसो ठाउँ तथा कर्णाली र सुदूरपश्चिमका धेरै ठाउँमा चट्याङसहित मध्यम वर्षा र हिमपात हुने देखिएको छ। केही ठाउँमा भारी वर्षा र हिमपात पनि हुन सक्ने भएकाले सतर्कता अपनाउन महाशाखाले भनेको छ।
