कैलालीमा वन पैदावारको कारोबार करिब चार महिनादेखि बन्द छ। केही सामुदायिक वनमा स्वीकृत योजनाभन्दा बढी रूख काटिएको र अनियमितता भएको उजुरी परेपछि प्रदेश सरकारले गत असार ९ गतेदेखि काठको बिक्रीवितरणमा रोक लगाएको हो।
रोकसँगै घाटगद्दीमा करिब पाँच लाख क्युफिट काठ थन्किएको छ। लामो समयसम्म यसरी काठ थन्किँदा त्यसको गुणस्तरमा ह्रास आउने जोखिम बढेको छ। कारोबार बन्द हुँदा व्यवसायी, उपभोक्ता र सरकारी राजस्वसमेत प्रभावित भएका छन्।
प्रदेशको उद्योग, पर्यटन, वन तथा वातावरण मन्त्रालयले छानबिनका लागि बिक्रीवितरण रोक्न निर्देशन दिएको थियो। मन्त्रालयले गठन गरेको छानबिन समितिले प्रतिवेदन बुझाइसकेको भए पनि कारोबार अझै खुल्न सकेको छैन।
प्रदेश वन निर्देशनालयका प्रमुख वन निर्देशक हेमराज विष्टका अनुसार घाटगद्दीमा थन्किएको काठमध्ये डिभिजन वन कार्यालय धनगढीअन्तर्गत तीन लाखभन्दा बढी र पहलमानपुरअन्तर्गत डेढ लाखभन्दा बढी क्युफिट छ।
वन पैदावार व्यवसायीहरूले केही वनमा देखिएको समस्याका कारण जिल्लाभरि नै बिक्री रोक्नु अनुचित भएको बताएका छन्। कारोबार ठप्प हुँदा बैंकको ब्याज र किस्ता तिर्नसमेत समस्या भएको उनीहरूको भनाइ छ। सरोकारवालाहरूले समस्या देखिएका वनमा कारबाही गरेर अन्य क्षेत्रमा बिक्री खुलाउन र छिटो निर्णय लिन माग गरेका छन्।
