म्याग्दीको बेनी नगरपालिका–३ भकिम्लीमा उन्नत जातका गाई पालेर दूध उत्पादन गर्ने किसान बढ्दै गएका छन्। परम्परागत पशुपालनभन्दा फरक तरिकाले आयआर्जन गर्ने यो अभ्यासले गाउँमा स्वरोजगारीको अवसर सिर्जना गरेको छ।
भकिम्ली ग्रामीण कृषि सहकारी संस्थाले किसानलाई जर्सी र होलस्टेन जातका गाई ल्याउन सहयोग गरेको छ। अध्यक्ष लालबहादुर पुनका अनुसार गत वर्ष आठ किसानले गाईपालन थालेका थिए। उनीहरूको सफलता देखेर यस वर्ष थप १० किसान आउने तयारीमा छन्। अनुकूल हावापानी र नियमित आम्दानीको सम्भावनाले आकर्षण बढाएको र सहकारीले सहुलियत ब्याजमा ऋण दिएको उनले बताए।
पहिले भकिम्लीमा दूध बिक्रीका लागि गाई पालिँदैनथ्यो। स्थानीय जातका गाई घरायसी प्रयोजनका लागि मात्र राखिन्थे। अहिले घरायसी प्रयोग र स्थानीय बिक्रीपछि बचेको दैनिक ४० लिटर दूध बेनी–4 सिङ्गाको बास्कुना कृषि सहकारी संस्थामार्फत पोखराको सिजल डेरी उद्योगमा पठाइन्छ।
दुई उन्नत गाई पालेका चित्रबहादुर पुनले एउटा गाईको दूधबाट गत महिना खर्च कटाएर २७ हजार रुपैयाँ बचत भएको बताए। उनका अनुसार दुई गाईबाट दैनिक २० लिटरसम्म दूध आउन सक्छ। अहिले एउटाले दूध दिइरहेको छ भने अर्को ब्याउने अवस्थामा छ। विदेश र स्वदेशको कृषि कम्पनीमा छ वर्ष काम गरेको अनुभवले आफूलाई यो पेसामा ल्याएको उनको भनाइ छ।
बेनी–भकिम्ली सडक जीर्ण भएकाले दूध ढुवानी र कृत्रिम गर्भाधान सेवामा समस्या रहेको किसानको गुनासो छ। वडाध्यक्ष पदम पुनका अनुसार बेनी–दूधेखोला खण्ड प्रदेश सरकारबाट स्तरोन्नति भइसकेको छ र हल्लेगौडाभन्दा माथिको खण्ड यस वर्ष सङ्घीय सरकारबाट स्तरोन्नतिको चरणमा छ। दसैँपछि वडा कार्यालयमा पशु प्राविधिक आएपछि कृत्रिम गर्भाधान सेवा सुरु गरिने उनले बताए।
