तिहार नजिकिएसँगै बाँकेका किसानहरू आर्थिक दबाबमा परेका छन्। चाडपर्वको खर्च जुटाउन उनीहरूले भर्खरै भित्र्याएको धान व्यापारीलाई तोकिएको मूल्यभन्दा निकै कममा बेच्नुपरेको छ। खाद्य व्यवस्था तथा व्यापार कम्पनीले खरिद सुरु नगर्दा किसानको यो बाध्यता बढेको स्थानीय किसानहरूको गुनासो छ।
यस वर्ष कम्पनीले मोटा धानको प्रतिक्विन्टल तीन हजार ६६० रुपैयाँ र मध्यम धानको तीन हजार ८६० रुपैयाँ मूल्य तोकेको छ। तर बजारमा व्यापारीहरूले त्योभन्दा पाँच सयदेखि एक हजार रुपैयाँसम्म कम तिरेर धान किनिरहेका छन्। नेपालगन्ज–१९ सुईयागाउँका किसान ध्रुव थापाका अनुसार यस वर्ष उत्पादन राम्रो भए पनि भण्डारणको सुविधा नहुँदा र चाडपर्वको खर्च जुटाउनुपर्दा किसानले सस्तोमै बेच्नुपरेको हो। कम्पनीको खरिद प्रक्रिया ढिलो र झन्झटिलो हुने भएकाले पनि किसान व्यापारीतिर जाने गरेको उनले बताए।
गत वर्ष कम्पनीले मोटा धानको तीन हजार ४६३ रुपैयाँ र मध्यमको तीन हजार ६२८ रुपैयाँ मूल्य तोकेको थियो। नेपालगन्जस्थित मुख्य शाखाले गत वर्ष २० हजार क्विन्टलको कोटा तोकेर खरिद गरेको थियो। तर यस वर्ष अहिलेसम्म कुनै कोटा तोकिएको छैन। खजुरा गाउँपालिका–२ का किसान गेहेन्द्र धितालका अनुसार सरकारले समर्थन मूल्य तोके पनि व्यापारीले आफूखुसी मूल्य राख्दा वर्षभरको मेहनत घाटामा बेच्नुपरेको छ। बाँकेका धेरै किसानले दसैँअघि नै धान घर भित्र्याइसकेका छन्।
कम्पनीको नेपालगन्ज प्रमुख रामशरण लामिछानेले मूल्य केन्द्रबाट निर्धारण भए पनि खरिद कोटा नतोकिएको बताए। कोटा निर्धारण भएको पत्र आएलगत्तै खरिद सुरु गरिने उनको भनाइ छ।
