भारतको राजधानी दिल्लीमा रहेको एउटा जुत्ता कारखानामा शुक्रबार राति लागेको आगोमा चार जनाको ज्यान गएको छ। आगलागी दिल्लीको मंगोलपुरी औद्योगिक क्षेत्रमा भएको हो।
प्रहरीका अनुसार राति साढे नौ बजे मंगोलपुरी औद्योगिक क्षेत्रको फेज–१ मा रहेको बी–२९३/२९४ नम्बरको भवनमा आगो सल्किएको थियो। उक्त कारखानामा जुत्ता उत्पादन गर्ने र भण्डारण गर्ने काम हुँदै आएको थियो।
आगो लागेपछि उद्धार टोलीले कारखानाभित्रबाट छ जनालाई बेहोस अवस्थामा बाहिर निकालेको थियो। उनीहरूलाई तत्कालै नजिकैको सञ्जय गान्धी मेमोरियल अस्पताल पुर्याइएको थियो। अस्पतालमा चिकित्सकले चार जनालाई मृत घोषणा गरेका छन् भने बाँकी दुई जनाको उपचार भइरहेको छ।
आगलागीको कारण भने अझै खुल्न सकेको छैन। प्रहरीले घटनाबारे अनुसन्धान सुरु गरेको जनाएको छ। कारखानामा आगो कसरी सल्कियो र सुरक्षाका उपायहरू कस्ता थिए भन्नेबारे छानबिन भइरहेको छ।
