चीनको नानजिङ सहरमा सडक सफाइका लागि चालकविहीन रोबोटको प्रयोग विस्तार हुँदै गएको छ। सहरका विभिन्न पार्क, सडक, सार्वजनिक चोक र प्रविधि पार्कमा यस्ता उपकरण परीक्षण तथा प्रयोगमा छन्। यी रोबोटले सफाइ मात्र गर्दैनन्, सडकमा परेका खाल्डाखुल्डी र सार्वजनिक संरचनामा देखिएको क्षति पनि पत्ता लगाउन सक्छन्।
उपकरणमा जडान गरिएको लेजर राडार र विभिन्न सेन्सरले सडकको अवस्था निगरानी गर्छन्। क्षति भेटिएपछि त्यसको जानकारी सम्बन्धित निकायलाई पठाइन्छ। यसरी सफाइ र पूर्वाधार अनुगमन एउटै प्रणालीबाट अघि बढाउन सकिने अपेक्षा गरिएको छ। सफाइका क्रममा संकलन हुने तथ्यांक सहरी व्यवस्थापनमा पनि प्रयोग गर्न सकिन्छ।
नानजिङको जिजिनसान विज्ञान तथा प्रविधि सहरमा प्रयोग भइरहेको एउटा उपकरणले प्रतिघण्टा करिब सात हजार वर्गमिटर क्षेत्रफल सफा गर्न सक्छ। जियाङबेई नयाँ क्षेत्रको छिलिहे नदी किनारको पदमार्गमा एउटा रोबोटले डेढ घण्टामा पाँच किलोमिटर पदमार्ग सफा गर्ने गरेको छ। एउटा उपकरणले दुईदेखि तीन जना सरसफाइ कर्मचारी बराबरको काम गर्न सक्ने बताइएको छ।
नानजिङ दक्षिण रेलवे स्टेसनको चोकमा रोबोटले ठूलो क्षेत्रको सामान्य सफाइ गर्छन् भने कर्मचारीले कुनाकाप्चाको सफाइ र अनुगमनमा ध्यान दिन्छन्। यी उपकरण कृत्रिम बुद्धिमत्तामा आधारित सहरी व्यवस्थापन केन्द्रसँग जोडिएका छन्, जसले आवश्यकता र उपकरणको अवस्थाअनुसार काम र मार्ग निर्धारण गर्छ। नगर व्यवस्थापन विभागले आगामी दिनमा पार्क, प्रविधि पार्क र सडकमा यस्ता उपकरणको प्रयोग विस्तार गर्ने योजना बनाएको छ। तर खुला सडकमा व्यापक प्रयोग गर्नुअघि अनुमति, सुरक्षा मूल्यांकन र सञ्चालनसम्बन्धी मापदण्ड पूरा गर्नुपर्ने अधिकारीहरूले बताएका छन्।
