भारतको विपक्षी गठबन्धन इन्डिया ब्लकले मुख्य निर्वाचन आयुक्त ज्ञानेश कुमारलाई पदबाट हटाउन माग गर्दै आइतबार राजधानी नयाँदिल्लीस्थित रामलीला मैदानमा विशाल विरोध प्रदर्शन आयोजना गरेको छ। र्यालीमा सहभागी हुन बिहानैदेखि विभिन्न राजनीतिक दलका नेता तथा कार्यकर्ता जुट्न थालेका छन्।
कांग्रेस, ममता बनर्जी नेतृत्वको तृणमूल कांग्रेससहित विपक्षी दलहरूले र्यालीलाई समर्थन गरेका छन्। निर्वाचन आयोगको निष्पक्षता, मतदाताको अधिकार र लोकतान्त्रिक संस्थाहरूको संरक्षणलाई मुख्य मुद्दा बनाउँदै विपक्षी दलहरूले ‘भोट बचाओ–देश बचाओ’ अभियानअन्तर्गत प्रदर्शन गर्न लागेका हुन्।
रामलीला मैदानमा बिहानैदेखि कार्यकर्ता आउने क्रम सुरु भए पनि मैदानका केही भागमा अझै पानी जमेको देखिएको छ। र्यालीलाई लक्षित गर्दै राजधानीमा सुरक्षा व्यवस्था कडा पारिएको छ। दिल्ली प्रहरीका केन्द्रीय क्षेत्रका डीसीपी रोहित राजबीरले प्रदर्शनकारीको आगमन सुरु भएको र सुरक्षाका लागि आवश्यक तयारी पूरा गरिएको बताएका छन्। प्रहरीले प्रदर्शनस्थल र आसपासका क्षेत्रमा निगरानीका लागि २०० देखि २५० वटा सीसीटीभी क्यामेरा जडान गरेको छ भने र्याली आयोजकले पनि आफ्नै नियन्त्रण कक्ष स्थापना गरेका छन्।
कांग्रेस सांसद सुखदेव भगतले आइतबारको र्याली कुनै एक व्यक्तिविरुद्ध मात्र नभई लोकतान्त्रिक संस्थाहरूको संरक्षणका लागि भएको बताए। निर्वाचन प्रक्रियाको विश्वसनीयता कमजोर भएको आरोप लगाउँदै उनले र्यालीलाई जनताको आवाजका रूपमा व्याख्या गरे। राजस्थान कांग्रेस अध्यक्ष गोविन्द सिंह डोटासराले र्यालीमा १० लाखभन्दा बढी मानिस सहभागी हुने दाबी गरेका छन्। उनले संविधान, राष्ट्र र नागरिकको मतदान अधिकारको रक्षा आन्दोलनको मुख्य उद्देश्य रहेको बताए।
यद्यपि केन्द्र सरकारका कानुनमन्त्री अर्जुन राम मेघवालले र्यालीको समयप्रति प्रश्न उठाएका छन्। दीपावलीको समयमा ठूलो प्रदर्शनले व्यापार र बजारमा असर पार्ने भन्दै उनले विपक्षी दलहरूले मिति परिवर्तन गर्नुपर्ने बताएका छन्। भारतीय जनता पार्टीका नेताहरूले मतदाता सूचीको विशेष गहन पुनरावलोकन विगतका सरकारहरूको कार्यकालमा पनि भएको भन्दै विपक्षीको विरोधलाई राजनीतिक रूपमा प्रेरित बताएका छन्। निर्वाचन आयोगको निष्पक्षता र मतदाता सूचीको पुनरावलोकनलाई लिएर भारतमा पछिल्लो समय राजनीतिक विवाद चर्किंदै गएको छ।
