स्याङ्जा — चालु आर्थिक वर्ष २०८३/०८४ को पहिलो तीन महिनामा स्याङ्जामा ट्राफिक नियम उल्लङ्घन गर्ने तीन हजार १८ वटा सवारीसाधनमाथि कारबाही भएको छ। जिल्ला ट्राफिक प्रहरी कार्यालय स्याङ्जाका अनुसार कारबाहीबाट कुल २८ लाख चार हजार रुपैयाँ राजस्व संकलन भएको हो।
साउनदेखि असोजसम्मको अवधिमा सबैभन्दा बढी जीप, कार तथा भ्यान कारबाहीमा परेका छन्। कार्यालयका प्रमुख प्रहरी नायब निरीक्षक नरेन्द्रबहादुर शाहीका अनुसार ९१७ वटा जीप, कार तथा भ्यानबाट नौ लाख ६८ हजार रुपैयाँ राजस्व उठेको छ।
त्यसैगरी ९०९ वटा मोटरसाइकल तथा स्कुटरबाट आठ लाख ४९ हजार पाँच सय रुपैयाँ संकलन भएको छ। ३८२ वटा बसबाट तीन लाख १३ हजार पाँच सय, ३३५ वटा ट्रकबाट दुई लाख ९५ हजार, २५८ वटा अन्य सवारीसाधनबाट दुई लाख छ हजार र २१७ वटा ट्र्याक्टरबाट एक लाख ७२ हजार रुपैयाँ राजस्व संकलन भएको शाहीले बताए।
कारबाहीसँगै सडक दुर्घटना घटाउन जनचेतनामूलक कार्यक्रम पनि निरन्तर सञ्चालन भइरहेको उनले जानकारी दिए। गति नियन्त्रण गर्ने, हेल्मेट र सिटबेल्ट प्रयोग गर्ने तथा सडक अनुशासन पालना गर्नुपर्नेमा उनले चालकहरूलाई आग्रह गरे। सवारीसाधनको नियमित जाँच र नियम मिच्नेलाई कारबाही गर्ने काम जारी रहने उनको भनाइ छ।
यसै अवधिमा जिल्लामा १८ वटा सडक दुर्घटना भएका छन्। ती दुर्घटनामा परी ६ जनाको मृत्यु भएको छ भने आठ जना गम्भीर र २१ जना सामान्य घाइते भएका छन्। दुर्घटनाबाट हुने मानवीय क्षति कम गर्न चालक, यात्रु र सडक प्रयोगकर्ता सबैले ट्राफिक नियमको पालना गर्नुपर्नेमा ट्राफिक प्रहरी प्रमुख शाहीले जोड दिए।
