पूर्वप्रधानमन्त्री डा. बाबुराम भट्टराईले देश ठूलो सङ्कटतर्फ उन्मुख भइरहेको सङ्केत देखिएको बताएका छन्। आइतबार सामाजिक सञ्जाल फेसबुकमार्फत उनले बढ्दो भूराजनीतिक चलखेल, राजनीतिक दलभित्रको आन्तरिक द्वन्द्व र राज्यका प्रमुख निकायमा देखिएको अस्तव्यस्तताले देशको अवस्था थप जटिल बन्दै गएको धारणा राखेका हुन्।
भट्टराईले सत्तारूढ र प्रतिपक्षी दलभित्र चर्कँदो अन्तरसंघर्ष, न्यायालय, प्रशासन र प्रहरीलगायत राज्यका प्रमुख अङ्गमा देखिएको अव्यवस्था तथा अर्थतन्त्रको निरन्तर ओरालो यात्राले देशको अवस्था थप जटिल बन्दै गएको बताएका छन्। थपिँदो प्राकृतिक प्रकोपको भार, युवाहरूको निरन्तर विदेश पलायन, सार्वजनिक सञ्चार क्षेत्र र नागरिक वृत्तमा चुलिँदो निराशा समेतले देश ठूलो सङ्कटतिर उन्मुख भइरहेको सङ्केत गर्ने उनको भनाइ छ।
उनले लेखेका छन्, ‘देशमा बढ्दो भूराजनीतिक चलखेलको पृष्ठभूमिमा सत्ताधारी र प्रतिपक्षी दलहरूभित्रै चर्कँदो अन्तरसंघर्ष, राज्यका प्रमुख अङ्गहरू न्यायालय, प्रशासन, प्रहरी लगायतमा अस्तव्यस्तता, अर्थतन्त्रको निरन्तर ओरालो यात्रा, थपिँदो प्राकृतिक प्रकोपको भार, युवाहरूको निरन्तर विदेश पलायन, सार्वजनिक सञ्चार क्षेत्र र नागरिक वृत्तमा चुलिँदो निराशा, आदिले देश ठुलो सङ्कटतिर उन्मुख भइरहेको सङ्केत गर्छ !’
अब कुनै पनि बहानामा देशले अस्थिरता र उथलपुथल थेग्न नसक्ने भन्दै भट्टराईले सबैलाई आ-आफ्नो क्षेत्रबाट गम्भीर बन्न आग्रह गरेका छन्। ‘सक्छौँ, सकारात्मक योगदान गरौँ ! सक्दैनौँ, नकारात्मक काम नगरौँ !’ भन्ने उनको आह्वान छ।
