काठमाडौं । देशकै पहिलो सुरुङमार्गका रूपमा परिचित नागढुङ्गा सुरुङमार्ग प्रयोग गर्ने सवारीसाधनबाट आजदेखि सडक दस्तुर लिन थालिएको छ । कात्तिक १५ गते आइतबार राति १२ बजेदेखि लागू भएको यो व्यवस्थाअनुसार सुरुङमार्ग हुँदै काठमाडौं भित्रिने र बाहिरिने सबै सवारीले तोकिएको शुल्क तिरेर मात्र यात्रा गर्न पाउनेछन् ।
दर नेपाल राजपत्रमा प्रकाशित सवारी वर्गीकरणका आधारमा तय गरिएको छ । साना कार, जिप, भ्यान र माइक्रोबसले राजधानी भित्रिँदा ६५ रुपैयाँ र बाहिरिँदा ६० रुपैयाँ बुझाउनुपर्नेछ । ठूला सवारीसाधनका लागि भने भित्रिँदा ६०० रुपैयाँ र बाहिरिँदा २५० रुपैयाँ तोकिएको छ ।
आयोजनाका प्रमुख इन्जिनियर सौजन्य नेपालका अनुसार सुरुमा नगद र क्यूआरमार्फत शुल्क भुक्तानी गर्न सकिनेछ । पछिल्ला चरणमा आरएफआईडी कार्ड तथा ट्याग प्रणाली जडान गरी भुक्तानी स्वचालित बनाउने तयारी छ ।
दस्तुर संकलनको काम सेवा प्रदायकका कर्मचारीले गर्नेछन् । यसरी उठेको रकम सडक बोर्ड नेपालको खातामा जम्मा हुने व्यवस्था गरिएको छ । संकलनको सञ्चालन र अनुगमन सडक बोर्ड नेपाल तथा सडक विभागले संयुक्त रूपमा गर्नेछन् ।
