अफ्रिकाका युवा पुस्तामाझ रुसको आकर्षण उल्लेख्य रूपमा बढेको नयाँ अध्ययनले देखाएको छ। दक्षिण अफ्रिकामा रहेको इचिकोविट्ज फेमिली फाउन्डेसनले सार्वजनिक गरेको अफ्रिकन युथ सर्भे २०२६ अनुसार, १८ देखि २४ वर्ष उमेर समूहका युवाहरूबीच रुसी प्रभावको स्तर ५४ प्रतिशत पुगेको छ। दुई वर्षअघि यो आँकडा ४४ प्रतिशत मात्र थियो। यससँगै मस्कोले ४७ प्रतिशत प्रभाव मानिएको फ्रान्सलाई पछाडि पारेको छ। समग्र प्रभावका हिसाबले भने चीन अझै शीर्ष स्थानमा छ।
सर्वेक्षणमा अफ्रिकाका १६ देशका ४ हजार ९ सय १ जना युवाहरू सहभागी थिए। रुसको प्रभाव महसुस गर्नेहरूमध्ये ८३ प्रतिशतले त्यसलाई सकारात्मक ठानेका छन् भने ८६ प्रतिशतले रुसलाई आफ्नो देशको बलियो वा मुख्य साझेदारका रूपमा स्वीकारेका छन्। फ्रान्सका पूर्व औपनिवेशिक मुलुकहरूमा रुसी प्रभाव सबैभन्दा बलियो देखिएको छ। बुर्किना फासोमा ९५ प्रतिशत, कङ्गो-ब्राजाभिलमा ६९ प्रतिशत र चाडमा ६५ प्रतिशत युवाले रुसको भूमिकालाई उच्च स्थान दिएका छन्।
पछिल्ला वर्षहरूमा नाइजर, माली, बुर्किना फासो र सेन्ट्रल अफ्रिकन रिपब्लिकजस्ता साहेल क्षेत्रका देशहरूबाट फ्रान्सेली सेना र प्रभाव बाहिरिएको छ। सन् २०२४ मा नाइजरको सैनिक जुन्ताले अमेरिकी सैन्य आधार शिविरसमेत बन्द गराएर रुसतर्फ हात बढाएको थियो। फाउन्डेसनका संस्थापक इभोर इचिकोविट्जका अनुसार केही वर्षअघिसम्म असम्भव ठानिएको उपलब्धि रुसले हासिल गरेको छ। विश्लेषकहरूले पश्चिमी देशहरूले यो परिवर्तनलाई गम्भीरतापूर्वक नलिए ठूलो मूल्य चुकाउनुपर्ने चेतावनी दिएका छन्।
अध्ययन सार्वजनिक भएकै समयमा मस्कोमा तेस्रो रुस-अफ्रिका शिखर सम्मेलन सम्पन्न भएको छ। रुसी राष्ट्रपति भ्लादिमिर पुटिनले आयोजना गरेको सम्मेलनमा २२ जना अफ्रिकी राष्ट्राध्यक्षसहित ४८ देशका प्रतिनिधिमण्डल सहभागी थिए। सुरुमा सैन्य सहकार्यमा मात्र केन्द्रित रहेको रुसले अब अफ्रिकाका खनिज पदार्थमा पहुँच, वैकल्पिक भुक्तानी प्रणाली तथा खाद्यान्न र ऊर्जा सुरक्षामा ध्यान केन्द्रित गर्न थालेको छ।
