काभ्रे — गत कात्तिक १३ र १४ गते परेको भारी वर्षापछिको बाढीले बेथानचोक गाउँपालिका–४ स्थित खहरेका सात परिवार प्रभावित भएका थिए। बाढीले उनीहरूको घर तथा दैनिक प्रयोगका सामानमा क्षति पुर्याएको थियो। ती परिवारलाई नेपाल रेडक्रस सोसाइटीले राहत सामग्री वितरण गरेको छ।
वितरण गरिएका सामग्रीमा त्रिपाल, म्याट्रेस, भाँडाकुँडा र लत्ताकपडा रहेका छन्। बाढीपछि अस्थायी बसोबास र दैनिकी चलाउन यी सामग्री तत्काल आवश्यक रहेको रेडक्रसको भनाइ छ। राहत वितरण स्थानीय तहसँगको समन्वयमा गरिएको हो।
नेपाल रेडक्रस सोसाइटी काभ्रेपलाञ्चोक जिल्ला शाखाका मन्त्री राजु सिग्देलले विपद्का बेला प्रभावित नागरिकलाई सहयोग गर्नु मानवीय दायित्व भएको बताए। उनले आवश्यकताअनुसार प्रभावित क्षेत्रमा सहयोगका गतिविधि निरन्तर अघि बढाइने उल्लेख गरे।
जिल्लामा बाढी र पहिरोका घटनापछि रेडक्रसले विभिन्न ठाउँमा राहत तथा सहयोगका काम गर्दै आएको छ। प्रभावित परिवारको अवस्था हेरेर थप सहयोगको योजना बनाइने शाखाले जनाएको छ।
