काठमाडौं । जापानका लागि प्रस्तावित राजदूत जिज्ञानकुमार थापाको नियुक्तिबारे निर्णय गर्न संसदीय सुनुवाइ समितिको बैठक सुरु भएको छ । सोमबार सिंहदरबारमा बसेको बैठकले थापालाई अनुमोदन गर्ने वा नगर्ने भन्ने विषयमा टुंगो लगाउने समितिले जनाएको छ ।
यसअघि असोज २८ गते भएको सुनुवाइमा थापासँग जापानको स्थायी बसोबास अनुमतिपत्र रहेको विषय उठेपछि समितिले निर्णय रोकेको थियो । सुनुवाइका क्रममा थापाले आफूले जापानको स्थायी बसोबास अनुमति त्यागिसकेको स्पष्टीकरण दिएका थिए । तर सांसदहरूले संविधानको धारा २९१ को व्यवस्था र अनुमतिपत्र त्यागेको समयावधिबारे थप प्रश्न उठाएका थिए ।
समितिले यस विषयमा स्पष्ट हुन परराष्ट्र मन्त्रालयमार्फत जापान सरकारसँग विवरण मागेको थियो । स्रोतका अनुसार उक्त विवरण अझै प्राप्त भएको छैन । जवाफ नआएकै अवस्थामा समितिले आजको बैठक बोलाएको हो ।
बैठकमा समिति सदस्यहरूले थापाको योग्यता र उनीमाथि उठेका प्रश्नबारे छलफल गरेपछि अन्तिम निर्णय सार्वजनिक हुने अपेक्षा गरिएको छ । थापाको नियुक्ति अनुमोदन भए वा नभए भन्ने कुराले आगामी दिनमा अन्य देशका लागि राजदूत सिफारिस प्रक्रियामा समेत असर पार्ने देखिएको छ ।
