काठमाडौं । नेपाली सेनाका पूर्वमेजर विश्वबहादुर शाह अमेरिकाको न्यु ह्याम्पसायर राज्यको प्रतिनिधिसभा सदस्यका लागि चुनावी मैदानमा उत्रिएका छन् । डेमोक्रेटिक पार्टीका तर्फबाट उम्मेदवार बनेका शाह हिल्सबरो काउन्टी डिस्ट्रिक्ट–४१ बाट पहिलोपटक चुनाव लड्न लागेका हुन् । यस क्षेत्रबाट तीन जना प्रतिनिधि चुनिनेछन् भने डेमोक्रेटिक र रिपब्लिकनका तीन–तीन उम्मेदवार प्रतिस्पर्धामा छन् ।
शाहले आफ्नो उम्मेदवारीलाई नेपालीसहित विभिन्न अल्पसंख्यक समुदायको प्रतिनिधित्वसँग जोडेका छन् । ती समुदायलाई दलहरूले मतदाताका रूपमा मात्र हेर्ने गरेको भन्दै उनले समुदायको आवाज पनि राज्य संसदमा पुग्नुपर्ने धारणा राखेका छन् ।
आवास, शिक्षा र ज्येष्ठ नागरिकको आर्थिक अवस्था उनका प्रमुख मुद्दा हुन् । घर पाउन र त्यसको खर्च धान्न कठिन भएको, सार्वजनिक विद्यालयले पर्याप्त बजेट नपाएको र शिक्षकले पाउनुपर्ने सुविधा नपुगेको उनको भनाइ छ । ज्येष्ठ नागरिकको आम्दानी नबढ्ने तर घरजग्गा कर तिर्नुपर्ने भएकाले उनले कर छुटको माग गरेका छन् ।
तनहुँ पुर्ख्यौली घर भएका शाहले बुटवल हाइस्कुल र पुल्चोक क्याम्पसबाट सिभिल इन्जिनियरिङमा प्रमाणपत्र तह पूरा गरे । त्यसपछि सेनामा सेकेन्ड लेफ्टिनेन्टका रूपमा प्रवेश गरी इन्जिनियर्स बटालियनमा सडक तथा पुल निर्माणमा संलग्न भए । पन्ध्र वर्ष सेवा गरेपछि उनले मेजर पदमा रहँदै जागिर छाडे ।
सन् २००२ मा श्रीमतीको स्वास्थ्य जाँचका लागि अमेरिका पुगेका उनी त्यतै बस्न थाले । न्युयोर्कमा स्यान्डविच रेस्टुरेन्टमा करिब दुई वर्ष काम गरेपछि उनी उबर चालक बने, पछि बिमा र रियल इस्टेट क्षेत्रमा पनि काम गरे । उनले ‘नयाँ नेपाल खबर’ पत्रिका प्रकाशन गरे भने सन् २०१३ मा लिएको सबवे फ्रेन्चाइज भाडा महँगो भएकाले सन् २०१८ मा बन्द गर्नुपर्यो ।
सन् २०१६ मा बर्नी स्यान्डर्सको चुनावी अभियानमा स्वयंसेवक बनेका शाह सन् २०१९ मा न्यु ह्याम्पसायर सरे । अहिले म्यानचेस्टरमा बस्दै आएका उनी अपांगता भएका वयस्कलाई आवासीय सुविधा दिने काममा सात वर्षदेखि आबद्ध छन् । नोभेम्बर ३ को निर्वाचनमा जिते राज्यका नीति, बजेट र विकासमा काम गर्ने उनको योजना छ ।
