युगान्डाले सोमालियामा तैनाथ आफ्ना सैनिक फिर्ता गर्ने प्रक्रिया सुरु गरेको छ। सोमालियाको सङ्घीय सरकारसँग भएको द्विपक्षीय सम्झौताअनुसार फिर्ती प्रक्रिया तत्काल थालिएको युगान्डाली सेनाले जनाएको छ।
युगान्डाले सन् २०२७ को अन्त्यसम्ममा सोमालियाबाट आफ्ना सबै सैनिक फिर्ता गर्ने योजना बनाएको छ। अफ्रिकी सङ्घ सहयोग तथा स्थिरीकरण मिसन इन सोमालिया (एयूएसओएम) अन्तर्गत परिचालित सैनिक पनि फिर्ता हुने सेनाको विज्ञप्तिमा उल्लेख छ।
सन् २००७ मा अफ्रिकी सङ्घले सोमालियामा इस्लामिक विद्रोहीविरुद्ध सैन्य अभियान सुरु गर्दा युगान्डा सेना पठाउने पहिलो देश बनेको थियो। त्यसयता हजारौँ सैनिक परिचालन गर्दै युगान्डाले अभियानमा प्रमुख भूमिका निर्वाह गर्दै आएको थियो।
पछिल्लो अफ्रिकी सङ्घीय मिसनअन्तर्गत सोमालियामा युगान्डाका चार हजार पाँच सयदेखि छ हजार सैनिक तैनाथ थिए। द्विपक्षीय सम्झौताअन्तर्गत थप दुई हजारदेखि दुई हजार पाँच सय सैनिक परिचालित थिए।
पछिल्ला महिनामा अमेरिका लगायतका प्रमुख आर्थिक सहयोगीले आर्थिक सहायता कटौती गरेपछि सोमालियामा सञ्चालित अन्तरराष्ट्रिय सैन्य अभियानको भविष्य अनिश्चित बनेको छ। अमेरिकाले संयुक्त राष्ट्रसङ्घको रसद तथा बन्दोबस्तीसम्बन्धी मिसनलाई दिँदै आएको आर्थिक सहयोगसमेत फिर्ता लिएको छ।
अन्तरराष्ट्रिय सैन्य अभियान जारी रहे पनि अलकायदासँग आबद्ध अल–शबाब समूहले सोमालियाका मध्यवर्ती क्षेत्रका ठूला भूभागमा अझै नियन्त्रण कायम राखेको छ। विद्रोहीविरुद्धको कारबाहीमा पर्याप्त प्रगति नभएको र सोमाली सरकारले राष्ट्रिय एकता तथा राजनीतिक सुधारमा अपेक्षित काम गर्न नसकेको भन्दै अमेरिकाले असन्तुष्टि जनाउँदै आएको छ।
युगान्डाली सेनाले सेना फिर्तीको निर्णयसँगै सोमालियामा शान्ति र स्थायित्व कायम गर्न विगत २० वर्षदेखि गर्दै आएको सहयोग अभियान अन्त्य हुने जनाएको छ। यस कदमले सोमाली सशस्त्र बललाई देशको सुरक्षाको पूर्ण जिम्मेवारी लिन सक्षम बनाउने सेनाको भनाइ छ।
