अमेरिकी प्रविधि कम्पनी गुगलले मलेसियामा पानीसँग सम्बन्धित ठूलो पूर्वाधार निर्माण गर्न १६ करोड अमेरिकी डलर लगानी गर्ने भएको छ। कम्पनीले मलेसियाको नेगेरी सेम्बिलान राज्यमा साझा पानी प्रणाली बनाउने योजना सार्वजनिक गरेको हो।
यो आयोजनाबाट दुईवटा उद्देश्य पूरा हुने कम्पनीको भनाइ छ। एकातर्फ स्थानीय बासिन्दाले सफा खानेपानी पाउनेछन् भने अर्कोतर्फ पोर्ट डिक्सनमा बन्न लागेको गुगलको डाटा सेन्टरलाई पनि पानी आपूर्ति हुनेछ।
आयोजनाअन्तर्गत बन्ने प्रशोधन केन्द्रले हरेक दिन ६ करोड ५० लाख लिटरसम्म पिउनयोग्य पानी उत्पादन गर्न सक्ने बताइएको छ। त्यो पानी सर्वसाधारणसँगै स्प्रिङहिल औद्योगिक पार्कभित्र निर्माण हुने डाटा सेन्टर परिसरमा समेत पुग्नेछ।
काम सकिएपछि पूर्वाधारको स्वामित्व राज्य सरकारको सम्पत्ति हेर्ने वैधानिक संस्था मेन्टेरी बेसर नेगेरी सेम्बिलान (निगमित) को हातमा जानेछ।
पानी पूर्वाधारसँगै गुगलले मलेसियामा स्वच्छ ऊर्जा क्षेत्रमा काम गर्ने दक्ष जनशक्ति तयार पार्न नयाँ कार्यक्रम पनि थाल्ने जनाएको छ।
