नेपाल प्रिमियर लिग (एनपीएल) मा लुम्बिनी लायन्सको उत्कृष्ट प्रदर्शन जारी छ। मंगलबार कीर्तिपुरमा भएको दिनको दोस्रो खेलमा लुम्बिनीले पोखरा एभेन्जर्सलाई आठ विकेटले पराजित गर्दै अंकतालिकाको शीर्ष स्थानमा उक्लिएको छ।
टस हारेर पहिले ब्याटिङ गरेको पोखराले निर्धारित २० ओभरमा ९७ रन मात्र बनाउन सक्यो। जवाफमा लुम्बिनीले ११ ओभर ४ बलमा दुई विकेट गुमाउँदै ९८ रनको लक्ष्य पूरा गर्यो। यो जितसँगै लुम्बिनी तीन खेलमा अपराजित रहँदै पाँच अंकसहित शीर्ष स्थानमा पुगेको छ। उता, लगातार तेस्रो खेल हारेको पोखरा अंकविहीन हुँदै तालिकाको पुछारमा झरेको छ।
लुम्बिनीको जितमा कप्तान रोहित पौडेलले नायकको भूमिका खेले। उनले ४७ रनको महत्वपूर्ण पारी खेले भने निरोशन डिकवेलाले २७ रन थपे। ओपनर आशिफ शेख भने ७ रनमै पेभिलियन फर्किए। पोखराका बलरमध्ये बिपिन खत्रीले मात्र एक विकेट लिन सके; अन्य पाँच बलर विकेटविहीन रहे।
यसअघि पोखराको ब्याटिङमा चमिका करुणारत्नेले सर्वाधिक २५ रन बनाएका थिए। कप्तान कुशल भुर्तेलले १४, माहेदी हसनले १३ र किरण ठगुन्नाले १२ रनको योगदान दिए।
पोखरालाई सस्तैमा रोक्न लुम्बिनीका रुबेन ट्रम्पेलम्यानले तीन विकेट लिए भने तिलक भण्डारीले दुई विकेट हात पारे। शेर मल्ल, अभिषेश गौतम र कप्तान रोहित पौडेलले एक-एक विकेट लिएका थिए।
