जापानको राजधानी टोकियोस्थित एउटा पसलमा भएको अनौठो चोरीको घटना अहिले चर्चामा छ। ग्राहक बनेर पसल छिरेका एक व्यक्तिले करिब दुई लाख ९० हजार अमेरिकी डलर पर्ने स्विस लक्जरी घडी हेर्ने बहानामा नाडीमा बाँधेर भागेका थिए। चोरी भएको करिब एक सातापछि उही घडी प्याकेजमार्फत पसलमा फिर्ता आइपुगेको छ।
घडीसँगै एउटा हस्तलिखित नोट पनि भेटिएको छ, जसमा ‘माफ गर्नुहोस्’ लेखिएको थियो। जापानी सञ्चारमाध्यम असाही सिम्बुनले सोमबार अज्ञात अनुसन्धान स्रोतलाई उद्धृत गर्दै घडी फिर्ता भएको खबर सार्वजनिक गरेको हो। घडीको सिरियल नम्बरका आधारमा फिर्ता आएको वस्तु नै चोरी भएको घडी हो भन्ने पुष्टि भएको बताइएको छ।
चोरी भएको घडी अडेमार्स पिगुएट ब्रान्डको हो। समाचार एजेन्सी एएफपीले यस विषयमा सम्पर्क गर्दा पसलले कुनै टिप्पणी गर्न चाहेन। असाही सिम्बुनका अनुसार टोकियो प्रहरीले चोरीमा संलग्न भएको आशंकामा ती व्यक्तिको खोजी जारी राखेको छ।
यो घटना भएको सपिङ कम्प्लेक्सकै अर्को पसलबाट यसै वर्ष अगस्टमा दुई करोड येन बराबरका चारवटा महँगा घडी चोरी भएका थिए।
