सगरमाथा क्षेत्रमा पर्यटकको चाप बढेसँगै हेलिकप्टर उडानको संख्या पनि बढेको छ, तर ती उडानको सुरक्षा व्यवस्थापन भने कमजोर देखिएको छ। मंगलबार सोलुखुम्बुको फेरिचे हेलिप्याडमा अवतरणका क्रममा दुई हेलिकप्टर आकाशमै ठोक्किए। एयर डाइनेस्टीको ९एन–एओडी र फिस्टेल एयरको ९एन–एजेआर ठोक्किँदा फिस्टेल एयरका ४७ वर्षीय भारतीय यात्री बसन्तकुमार बलरामुडुको ज्यान गयो। न्युजिल्यान्डका नागरिक शैलेसकिसन पटेल र दुवै हेलिकप्टरका चालक घाइते भएका छन्। घाइतेहरूको काठमाडौंमा उपचार भइरहेको छ।
लुक्लाभन्दा माथिको क्षेत्रमा लुक्ला विमानस्थलको हवाई यातायात नियन्त्रण कक्षको सञ्चार पुग्दैन। त्यसैले त्यहाँ उडान र अवतरणको समन्वय चालकहरूबीचको आपसी कुराकानीमै भर पर्छ। प्राधिकरणका एक प्राविधिकका अनुसार फेरिचे हेलिप्याडमा तोकिएका स्थानमा एकैपटक ६ देखि ७ वटा हेलिकप्टर अवतरण गर्न सक्छन्, तर मंगलबार दुवै चालकले एउटै अवतरण बिन्दु रोजेको देखिएको छ। दुर्घटनाका बेला मौसम सफा थियो र हावाको असर थिएन।
नेपालका निजी हेलिकप्टर कम्पनीको करिब ७० प्रतिशत व्यापार खुम्बु क्षेत्रमै केन्द्रित छ। तर मुख्य सिजनमा पनि ती हेलिप्याडमा नागरिक उड्डयन प्राधिकरणका कर्मचारी खटिँदैनन्। हेलिप्याडको अवस्था र अवरोधबारे प्राविधिक अध्ययन पनि हुने गरेको छैन।
यसअघि १२ कात्तिक २०८२ मा लोबुचेमा अल्टिच्युड एयरको हेलिकप्टर दुर्घटनामा परेको थियो। त्यसपछि बनेको छानबिन आयोगले खुम्बुका हेलिप्याडमा ग्राउन्ड स्टाफ राख्न, व्यस्त समयमा सब–बेसमा कर्मचारी खटाउन र उडानअघि जोखिम मूल्यांकन गर्न सुझाएको थियो। ती सुझावमध्ये अधिकांश अझै कार्यान्वयन भएका छैनन्।
नेपाल नागरिक उड्डयन प्राधिकरणका प्रवक्ता विक्रमराज गौतमले घटनाबारे छानबिन सुरु भइसकेको बताएका छन्। संस्कृति, पर्यटन तथा नागरिक उड्डयन मन्त्रालयका प्रवक्ता जयनारायण आचार्यले हवाई सुरक्षा मापदण्डको प्रभावकारी कार्यान्वयन उच्च प्राथमिकतामा रहेको बताएका छन्।
