वीरगञ्ज — मंगलबार बिहान वीरगञ्जको सिर्सिया चेकपोस्टमा प्रहरीले चाँदीबाट बनेका विभिन्न सामग्रीसहित दुई जनालाई नियन्त्रणमा लिएको छ। पक्राउ पर्नेमा वीरगञ्ज महानगरपालिका–१६ नगवाका ३६ वर्षीय रामप्रकाश सर्राफ र ३९ वर्षीय कृष्ण सहनी छन्।
जिल्ला प्रहरी कार्यालय पर्साका अनुसार बिहान करिब १० बजे इलाका प्रहरी कार्यालय छपकैयाबाट खटिएको टोलीले वीरगञ्ज–२५ स्थित चेकपोस्टमा मोटरसाइकल जाँच गरिरहेको थियो। जाँचका क्रममा उनीहरू सवार मोटरसाइकलमा चाँदीजस्तो देखिने धातुबाट बनेका सामान भेटिएपछि दुवैलाई नियन्त्रणमा लिइएको हो।
प्रहरी प्रवक्ता एवं डिएसपी चक्रबहादुर मल्लका अनुसार बरामद सामग्रीमा चार थान चम्चा, एउटा सिक्री, एउटा प्लेट, गणेश–लक्ष्मीका दुई थान मूर्ति, पाँच थान माछा, तीन थान हरिण, चार थान कछुवा र एउटा गोरुको आकृति छन्। ती सबैको कुल तौल ३२३ ग्राम १३० मिलिग्राम रहेको प्रहरीले जनाएको छ।
पक्राउ परेका दुवै जना र बरामद सामग्रीलाई थप कारबाहीका लागि वीरगञ्ज भन्सार कार्यालयमा बुझाइएको छ।
