काठमाडौं । राष्ट्रपति रामचन्द्र पौडेलले जलवायु परिवर्तन तथा हिमाली क्षेत्रका वातावरणीय समस्या समाधानमा स्विटजरल्याण्डसँग सहकार्य गर्न नेपाल उत्सुक रहेको बताएका छन् । नेपाल भ्रमणमा रहेको स्विटजरल्याण्डको राष्ट्रिय परिषद्का अध्यक्ष पियरे आन्द्रे पेजको प्रतिनिधिमण्डलसँग राष्ट्रपति भवन शीतल निवासमा सोमबार भएको शिष्टाचार भेटमा राष्ट्रपति पौडेलले सो धारणा व्यक्त गरेका हुन् ।
भेटमा राष्ट्रपति पौडेलले नेपालको शान्ति प्रक्रियामा स्विटजरल्याण्डको निरन्तर सहयोग महत्त्वपूर्ण रहेको बताएको र लोकतन्त्र, सङ्घीयता, स्थानीय शासन तथा सामाजिक–आर्थिक विकास सुदृढ गर्न स्विस सरकारले लामो समयदेखि गर्दै आएको सहयोगको प्रशंसा गरेको उनका प्रेस सल्लाहकार किरण पोखरेलले जानकारी दिए ।
राष्ट्रपति पौडेलले स्विटजरल्याण्डको सुदृढ लोकतान्त्रिक मूल्य र मान्यताबाट आफू निरन्तर प्रभावित रहेको पनि बताए ।
सो अवसरमा स्विटजरल्याण्डको राष्ट्रिय परिषद्का अध्यक्ष पियरेले हिमालहरू चलायमान हुँदै गएको उल्लेख गर्दै यसका लागि पूर्वसूचना प्रणाली अत्यन्त महत्त्वपूर्ण रहेको बताए । यस क्षेत्रमा स्विटजरल्याण्डले काम गरिरहेको सन्दर्भमा सहकार्य गरेर अगाडि बढ्न चाहेको उनले बताए ।
दुई देशबीच जलवायु तथा वातावरणीय क्षेत्रमा सहकार्य बढाउने विषयमा भएको छलफलले आगामी दिनमा साझेदारी थप बलियो बनाउने अपेक्षा गरिएको छ ।
