काठमाडौँ । राजधानी छिर्ने र निस्कने मुख्य बाटो बनेको नागढुंगा सुरुङमार्गमा सडक दस्तुर लागु भएपछि यात्रुहरू लामो लाइनमा बस्न बाध्य भएका छन् । छिटो र सहज यात्राका लागि बनेको सुरुङमा शुल्क तिर्न घण्टौँ कुर्नुपर्दा समयको झन् बर्बादी भएको चालक तथा यात्रुहरूको गुनासो छ ।
सुरुङमा स्वचालित प्रणालीबाट शुल्क काट्ने गरी एन–ट्यागको व्यवस्था गर्ने योजना थियो, तर प्राविधिक कारणले त्यो अझै सुरु हुन सकेको छैन । नागढुंगा सुरुङमार्ग निर्माण आयोजनाका इन्जिनियर सन्जय पन्थीका अनुसार सडक बोर्ड नेपालको सर्भरमा समस्या आएपछि आठ वटा बैंकमार्फत कार्ड वितरण गर्ने तयारी रोकिएको हो । बैंकबाट कार्ड बाँड्न सुरु नभएसम्म चालकहरूले एन–ट्याग पाउन सकेका छैनन् ।
दस्तुर लागु भएको पहिलो दिन करिब सात हजार पाँच सय सवारीसाधन सुरुङ भएर ओहोरदोहोर गरेका थिए, जसबाट पहिलो दिनमै ११ लाख ७० हजार रुपैयाँ दस्तुर संकलन भएको आयोजनाले जनाएको छ ।
हाल टोल प्लाजामा नगद र क्युआर कोडबाट मात्र शुल्क उठाइरहेकाले सवारी चाप बढी हुने समयमा लामो लाइन लाग्ने गरेको छ । पन्थीले पिक आवरमा लाइन धेरै हुने र अन्य समयमा खाली हुने अवस्था देखिएको स्वीकार गरे ।
तर आयोजनाका अनुसार यो समस्या छिट्टै समाधान हुनेछ । सडक बोर्डले सर्भरको समस्या समाधान गरिसकेको जानकारी दिएको छ र अबको एक–दुई दिनभित्रै बैंकहरूबाट एन–ट्याग कार्ड वितरण सुरु हुने पन्थीले बताए । कार्ड वितरण भएपछि सवारीसाधन नरोकिई स्वचालित रूपमा शुल्क काटिने भएकाले लाइन बस्नुपर्ने समस्या धेरै हदसम्म हट्ने आयोजनाको भनाइ छ । स्वचालित प्रणाली पूर्ण रूपमा चल्नुअघिसम्म भने यात्रुहरूले टोल प्लाजामा केही समय लाइनमै कुर्नुपर्ने देखिएको छ ।
