बाजुराको बडीमालिकामा भारी हिमपातपछि सम्पर्कविहीन भएका युवक मृत भेटिएका छन्। कञ्चनपुरको बेदकोट नगरपालिका दैजी घर भएका २० वर्षका मनिष बोहरा शुक्रबारदेखि सम्पर्कविहीन थिए। आइतबार बिहान सदरमुकामबाट हेलिकप्टरमार्फत गएको सुरक्षाकर्मीको टोलीले उनलाई बडीमालिकास्थित त्रिवेणी पाटन नजिकै मृत अवस्थामा फेला पारेको हो।
प्रमुख जिल्ला अधिकारी मुक्तिराम रिजालका अनुसार खोजी टोली आइतबार बिहानै हेलिकप्टरबाट बडीमालिका पुगेको थियो। खोजी कार्यका क्रममा त्रिवेणी पाटन नजिकै बोहरा मृत अवस्थामा भेटिएको उनले जानकारी दिए। मृतकको शव र खोजीमा खटिएका सुरक्षाकर्मीलाई हेलिकप्टरमार्फत ल्याउने पहल भइरहेको प्रमुख जिल्ला अधिकारी रिजालले बताए।
हिमपातपछि त्रिवेणी पाटनमा अलपत्र परेका कञ्चनपुरकै अर्का युवकको भने शनिबार दिउँसो उद्धार भएको छ। कृष्णपुर नगरपालिका-२ बस्ने २१ वर्षका सागर कार्कीलाई हेलिकप्टरमार्फत उद्धार गरी मार्तडी ल्याइएको थियो। कार्की चार हजार दुई मिटर उचाइमा रहेको बडीमालिका माताको दर्शन गरेर फर्कने क्रममा हिमपात भएपछि शुक्रबारदेखि त्रिवेणी पाटनस्थित धर्मशालामा बसेका थिए।
बडीमालिका धार्मिक तथा पर्यटकीय क्षेत्र हो। हिमपातको मौसममा त्यहाँ पुग्ने तीर्थयात्री र पर्यटकले मौसमको अवस्था बुझेर मात्र यात्रा गर्नुपर्नेमा प्रशासनले जोड दिएको छ।
