डोल्पाको सदरमुकाम दुनैस्थित जिल्ला कारागारबाट सुरुङ खनेर भागेका आठ कैदीबन्दीको पहिचान सार्वजनिक भएको छ। भाग्ने घटनाको छानबिन गर्न जिल्ला प्रहरी कार्यालय डोल्पाले तीन सदस्यीय समिति गठन गरेको छ।
जिल्ला प्रहरी कार्यालय डोल्पाका प्रमुख प्रहरी नायब उपरीक्षक अनिलराज गिरीका अनुसार समितिको नेतृत्व इन्स्पेक्टर विनय सिंहले गर्नेछन्। समितिमा जिल्ला प्रशासन कार्यालय डोल्पाका एक प्रतिनिधि र राष्ट्रिय अनुसन्धान विभागका एक कर्मचारी सदस्य रहेका छन्। समितिको प्रतिवेदनपछि कैदीबन्दी कसरी भागे भन्ने यकिन हुने उनले बताए।
प्रहरीका अनुसार घटना १३ कात्तिकको राति भएको हो। त्यसबारे १४ कात्तिकको बिहानमात्रै जानकारी आएको थियो। उक्त कारागारमा १७ जना कैदीबन्दी रहेका थिए, जसमध्ये आठ जना सुरुङ खनेर भागेका हुन्।
भागेकाहरूमा त्रिपुरासुन्दरी नगरपालिका–७ का २९ वर्षीय कालिप्रसाद रोकाया, त्रिपुरासुन्दरी–४ का २८ वर्षीय हरिबहादुर बुढा, बोरेकोट गाउँपालिका–१ का २५ वर्षीय यज्ञ विक, रुकुम पश्चिमको आठबिसकोट नगरपालिका–५ का ३८ वर्षीय तिलक भण्डारी, आठबिसकोट–१० का ३२ वर्षीय रामबहादुर कामी, सल्यानको कुमाख गाउँपालिका–५ का २८ वर्षीय रेशम राना, जाजरकोटको नलगाड नगरपालिका–९ का १९ वर्षीय कपिल परियार र आठबिसकोट–३ का ३२ वर्षीय अदेश भण्डारी छन्।
प्रहरीका अनुसार राति १० बजेसम्म उनीहरू सामान्य अवस्थामा थिए। त्यसपछि रड प्रयोग गरेर सुरुङ खन्न सुरु गरेको पाइएको छ। पर्खाल नै भत्काएर सुरुङ खनेर भागेको देखिएको प्रहरीले जनाएको छ। आठै जना अझै फरार छन् र उनीहरूको खोजीका लागि प्रहरी परिचालन गरिएको छ। चौबिसै घण्टा निगरानी हुने कारागारबाट कैदीबन्दी कसरी भाग्न सफल भए भन्ने प्रश्नले कारागारको सुरक्षा व्यवस्थामाथि गम्भीर प्रश्न उठाएको छ।
