काठमाडौं । गृह मन्त्रालयले राष्ट्रिय निजी तथा आवासीय विद्यालय एसोसिएसन नेपाल (एन-प्याब्सन) लाई निलम्बन गरेको छ। मन्त्रालयले शुक्रबार सार्वजनिक सूचना जारी गर्दै अर्को निर्णय नभएसम्मका लागि संगठन निलम्बन गरिएको जानकारी दिएको हो।
मन्त्रालयका अनुसार यो कदम राष्ट्रिय निर्देशन ऐन, २०१८ को दफा ६ को उपदफा (२) बमोजिम चालिएको हो। एन-प्याब्सनले सोही ऐनको दफा ५ बमोजिम मन्त्रालयबाट जारी भएका निर्देशनहरू पटक-पटक पालना नगरेको मन्त्रालयको भनाइ छ। साथै संगठनका पदाधिकारीहरूले सरकारबाट स्वीकृत विधान र संगठनको मूल उद्देश्यविपरीत गतिविधि गरेको आरोप पनि लगाइएको छ।
यस विषयमा मन्त्रालयले २०८३ असोज २३ गते सरोकारवालासँग छलफल गरेको थियो। छलफलमा ऐन तथा २०८२ मंसिर १२ गते जारी निर्देशनअनुसार काम गर्न आग्रह गरिएको भए पनि पालना नभएको मन्त्रालयले जनाएको छ। निर्देशनको निरन्तर अवज्ञा भएपछि निलम्बनको निर्णय लिइएको हो।
सूचना जारी भएपछि संस्थाका नाममा कुनै पनि समूह वा गुटबाट गरिने गतिविधि गैरकानुनी हुने मन्त्रालयले चेतावनी दिएको छ। त्यस्ता गतिविधिमा संलग्न भए प्रचलित कानुनबमोजिम कारबाही हुने सूचनामा उल्लेख छ।
