नेपाल राष्ट्र बैंकले गरेको अध्ययनले आर्थिक वर्ष २०८२/८३ मा कर्णाली प्रदेशको आर्थिक वृद्धिदर २.९४ प्रतिशत मात्र रहेको देखाएको छ । राष्ट्रिय स्तरमा ३.८९ प्रतिशतको वृद्धि हुने प्रक्षेपण रहँदा कर्णालीको गति त्यसभन्दा पछाडि देखिएको हो । राष्ट्रिय अर्थतन्त्रमा यस प्रदेशको हिस्सा ४.२० प्रतिशत मात्र छ, जुन सात प्रदेशमध्ये सबैभन्दा कम हो ।

प्रचलित मूल्यमा प्रदेशको कुल गार्हस्थ्य उत्पादन करिब २ खर्ब ७७ अर्ब २५ करोड रुपैयाँ पुग्ने अनुमान छ । कुल उत्पादनमा सेवा क्षेत्रको हिस्सा ५८.४१ प्रतिशत, कृषि क्षेत्रको ३१.५२ प्रतिशत र उद्योग क्षेत्रको योगदान १०.०७ प्रतिशत मात्र रहेको छ । राष्ट्रिय उत्पादनमा कर्णालीको अंश कृषिमा ५.५१ प्रतिशत, उद्योगमा ३.०२ प्रतिशत र सेवामा ३.७६ प्रतिशत छ ।

समीक्षा वर्षमा समग्र कृषि बालीको उत्पादन ०.६५ प्रतिशतले घटे पनि धान, मकै, गहुँ, कोदो, जौ र फापरजस्ता मुख्य खाद्य बालीको उत्पादन औसत ३.५५ प्रतिशतले बढेको छ । धान उत्पादन ६.७६ प्रतिशत, गहुँ २.५० प्रतिशत, जौ १३.७४ प्रतिशत र फापर २.५१ प्रतिशतले बढ्दा तरकारी तथा बागवानी उत्पादन ३.७६ प्रतिशत र फलफूल ४.०५ प्रतिशतले घटेको छ । स्याउ ३.२६ प्रतिशत र सुन्तला ३.८० प्रतिशतले घटेका छन् । दूध १५.८३ प्रतिशत, अण्डा ४.०१ प्रतिशत र ऊन ४४.६३ प्रतिशतले बढ्दा मासु २३.१६ प्रतिशत र माछा ५.०७ प्रतिशतले घटेको छ ।

प्रदेशको २ लाख ३ हजार १४४ हेक्टर खेतीयोग्य जमिनमध्ये १ लाख ३२ हजार ७३३ हेक्टरमा मात्र खेती भएको छ, जसमध्ये ४१.९० प्रतिशत अर्थात् ५५ हजार ६३० हेक्टरमा मात्र सिँचाइ सुविधा पुगेको छ । बैंक तथा वित्तीय संस्थाबाट प्रवाह हुने कृषि कर्जा १.५६ प्रतिशतले घटेर ४ अर्ब ९० करोड ६९ लाख रुपैयाँमा झरेको छ । नमुना उद्योगहरूको औसत क्षमता उपयोग ३०.८९ प्रतिशत मात्र रहँदा औद्योगिक कर्जा भने २५.६३ प्रतिशतले बढेर ५ अर्ब ७ करोड ४० लाख रुपैयाँ पुगेको छ ।

कर्णाली भित्रिने बाह्य पर्यटक २७.६८ प्रतिशतले घटेर २२ हजार १६३ मा सीमित भएका छन् । भारतबाट आउने पर्यटक ४६.३९ प्रतिशत, चीनबाट ६७.६० प्रतिशत र तेस्रो मुलुकबाट ३९.३९ प्रतिशतले घटेका छन् । गैरसरकारी संस्थाका गतिविधिमा आएको कमी र हवाई इन्धनको मूल्यवृद्धिलाई पर्यटक घट्नुको मुख्य कारण मानिएको छ ।

२०८३ असार मसान्तसम्म प्रदेशमा बैंक तथा वित्तीय संस्थाका शाखा ४८१ पुगेका छन् । कुल निक्षेप २२.०३ प्रतिशतले बढेर १ खर्ब ११ अर्ब १५ करोड रुपैयाँ र कर्जा प्रवाह ९.७९ प्रतिशतले बढेर ६६ अर्ब ८५ करोड रुपैयाँ पुगेको छ । कर्जा–निक्षेप अनुपात ६०.१५ प्रतिशत छ । प्रदेशमा कुल ४ हजार ३९२ किलोमिटर सडक बनेको छ, जसमध्ये ७५.४७ प्रतिशत कच्ची, १७.७१ प्रतिशत ग्राभेल र ६.८१ प्रतिशत मात्र कालोपत्रे छ । भेरी–बबई डाइभर्सन आयोजनाको भौतिक प्रगति ७० प्रतिशत पुगेको छ । समीक्षा वर्षमा कर्णालीबाट वैदेशिक रोजगारीका लागि श्रम स्वीकृति लिनेको संख्या ३० हजार ४९० पुगेको छ, जसमध्ये नयाँ स्वीकृति लिने ४ हजार ९५६ छन् ।