काठमाडौं — शुक्रबारको कारोबारमा सेयर बजार दिनभरि उकालो–ओरालो गर्दै अन्ततः २७ सय अंकभन्दा तल झरेको छ। दिउँसो साढे १२ बजे नेप्से परिसूचक २७१२ अंकसम्म पुगेको थियो। तर बजार बन्द हुँदा परिसूचक २६९० अंकमा रह्यो, जुन अघिल्लो दिनको तुलनामा ५.४५ अंक कम हो। अघिल्लो दिन नेप्से ३१ अंक बढेर २६९५ अंकमा पुगेको थियो।
परिसूचक घटे पनि कारोबार रकम भने सात महिनायताकै धेरै भएको छ। शुक्रबार कुल ८ अर्ब ८९ करोड रुपैयाँको कारोबार भयो। यो रकम वैशाख ३ यताकै उच्च हो — त्यो दिन ९ अर्ब ३१ करोडको कारोबार भएको थियो। अघिल्लो दिन ८ अर्ब ५५ करोडको किनबेच भएको थियो।
शुक्रबार १०२ कम्पनीको सेयर मूल्य बढ्दा १६९ कम्पनीको घट्यो भने ८ कम्पनीको मूल्य स्थिर रह्यो। समूहगत रूपमा विकास बैंकको सूचक सबैभन्दा धेरै १.६१ प्रतिशतले बढ्यो। निर्जीवन बीमा, व्यापार र अन्य समूह पनि सामान्य रूपमा उकालो लागे। बैंकिङ, फाइनान्स, जलविद्युत्, होटल तथा पर्यटन, लगानी, जीवन बीमा, उत्पादन तथा प्रशोधन र माइक्रोफाइनान्स समूह भने ओरालो लागे।
हालै सूचीकृत बेनी हाइड्रोपावरको मूल्य सबैभन्दा धेरै १५ प्रतिशतले बढ्यो। स्वाभिमान लघुवित्त, लुम्बिनी विकास बैंक र ग्रीन डेभलपमेन्ट बैंकका सेयर पनि उल्लेख्य रूपमा बढे। धेरै कारोबार भएका कम्पनीमा लुम्बिनी विकास बैंक, शिवम् सिमेन्ट, घलेम्दी हाइड्रोपावर, ग्रीन भेन्चर्स, सोलु हाइड्रोपावर, ग्लोबल आईएमई बैंक, रिलायन्स स्पिनिङ मिल्स र सोनापुर मिनरल्स अगाडि रहे।
