गोरखा — बूढीगण्डकी नदीको बगरमा झण्डै तीन साता अलपत्र परेको एउटा घरपालुवा कुकुरको अन्ततः उद्धार भएको छ। उत्तरी गोरखाको चुमनुब्री गाउँपालिका–३ जगतमा असोज २५ गते आएको बाढीपछि फसेको कुकुरलाई शुक्रबार सुरक्षित स्थानमा ल्याइएको हो।
जगतका कमल कार्कीले पालेको कुकुर बाढीले घर र पुल बगाउँदा नदीपारि थुनिएको थियो। घरधनीहरू पुल तरेर वारी आएको केहीबेरमै बाढीले घर र पुल दुवै बगाएको स्थानीयले बताएका छन्। सो बाढीले जगत क्षेत्रका चार घर बगाएको थियो।
कुकुरलाई हेलिकप्टरबाट उद्धार गर्ने तयारी बिहीबार गरिएको थियो। तर मौसम बिग्रिएपछि उडान सम्भव भएन। त्यसपछि धादिङको र्याफ्टिङ टोली, एनिमल नेपाल र चुमनुब्री गाउँपालिकाको समन्वयमा सिर्दिबास हुँदै जगत पुगेर कुकुरलाई निकालिएको गाउँपालिका अध्यक्ष निमा लामाले जानकारी दिए।
सो क्षेत्रमा बाढीका कारण केही बाख्राहरू पनि थुनिएका छन्। तिनको उद्धारको प्रयास भइरहेको गाउँपालिकाले जनाएको छ।
