काठमाडौं — भारतको उत्तराखण्डस्थित प्रसिद्ध तीर्थस्थल बदरीनाथ धामबाट फर्किँदै गरेको एउटा हेलिकप्टर शुक्रबार दुर्घटनामा परेको छ। चमोली जिल्ला हुँदै देहरादुनतर्फ जाँदै गरेको हेलिकप्टरका पाइलटसँग अहिलेसम्म कुनै सम्पर्क हुन सकेको छैन।
प्रारम्भिक जानकारीअनुसार हेलिकप्टर बदरीनाथबाट देहरादुनको सहस्रधाराका लागि उडेको थियो। उक्त हेलिकप्टरमा चालक दलका सदस्यबाहेक ६ जना यात्रु सवार रहेका थिए।
घटनापछि उत्तराखण्ड नागरिक उड्डयन विकास प्राधिकरण र प्रहरीको टोली उद्धार तथा खोजी कार्यमा जुटेका छन्। उद्धार टोलीले पाइलटसँग रेडियो वा अन्य माध्यमबाट सम्पर्क गर्ने प्रयास गरिरहे पनि अहिलेसम्म सफलता मिलेको छैन।
उक्त क्षेत्रमा मौसम प्रतिकूल रहेकाले खोजी कार्य प्रभावित भएको छ। खराब मौसमका बाबजुद हेलिकप्टरको स्थान पत्ता लगाउन ड्रोनको सहायताले खोजी तीव्र पारिएको प्रशासनले जनाएको छ। हेलिकप्टर दुर्घटना हुनुको यकिन कारण भने अझै खुल्न सकेको छैन।
