दक्षिणपूर्वी एसियाका विभिन्न मुलुकमा सञ्चालित अनलाइन ठगी केन्द्रमा फसेका ८६० जना नेपालीको उद्धार भएको छ। परराष्ट्र मन्त्रालयले शुक्रबार पत्रकार सम्मेलन गरी हालसम्म कम्बोडिया, म्यानमार, लाओस र थाइल्यान्डको सीमावर्ती क्षेत्रमा रहेका त्यस्ता केन्द्रबाट ८६० नेपाली नागरिकलाई निकालिएको जानकारी दिएको हो।
रोजगारीको झुटा आश्वासनमा परेर विदेश पुगेका नेपालीहरू ठगी केन्द्रमा काम गर्न बाध्य पारिने गरेका छन्। कतिपयले भाग्न खोज्दा कुटपिट र धम्कीको सामना गर्नुपरेको विवरण पनि सार्वजनिक हुँदै आएका छन्। यस्ता घटनामा अलपत्र पर्ने नेपालीको संख्या अझै घट्न नसकेको मन्त्रालयको भनाइ छ।
पीडित तथा उनीहरूका परिवारले मन्त्रालय, कन्सुलर सेवा विभाग र सम्बन्धित मुलुकस्थित नेपाली दूतावाससँग सम्पर्क गरिरहेका छन्। सम्पर्कमा आएका नागरिकलाई सुरक्षित रूपमा उद्धार गरी स्वदेश फर्काउने काम सम्बन्धित निकायसँगको समन्वयमा भइरहेको मन्त्रालयले जनाएको छ।
मन्त्रालयले वैदेशिक रोजगारीका नाममा आउने झुटा प्रलोभनमा नफस्न र गैरकानुनी काममा संलग्न नहुन सबैलाई आग्रह गरेको छ। कुनै शंकास्पद प्रस्ताव आएमा परिवार तथा सम्बन्धित निकायसँग बुझेर मात्र निर्णय गर्न पनि मन्त्रालयले सुझाव दिएको छ।
