काठमाडौँ । दक्षिण एसियाली क्षेत्रीय सहयोग सङ्गठन (सार्क) का १५औँ महासचिव मोहम्मद गोलाम सरवारले आफ्नो कार्यकाल पूरा गरी स्वदेश फर्केका छन् । परराष्ट्र मन्त्रालयका अनुसार २०८० कात्तिकमा नियुक्त भएका उनले तीन वर्षको कार्यकाल पूरा गरेका हुन् ।
सरवारको कार्यकालमा सार्कले उल्लेखनीय उपलब्धि हासिल गर्न नसकेको टिप्पणी हुँदै आएको छ । सन् २०१४ पछि सार्क शिखर सम्मेलन हुन नसकेको अवस्थामा सम्मेलन आयोजना गराउन नसकेको भन्दै उनको आलोचना समेत हुने गरेको थियो ।
बङ्गलादेशको प्रतिनिधित्व गर्दै महासचिव बनेका सरवार यस पदमा पुग्ने बङ्गलादेशका तेस्रो कूटनीतिज्ञ थिए । उनले सन् १९९१ मा बङ्गलादेशको कूटनीतिक सेवामा प्रवेश गरेका थिए । आफ्नो लामो कूटनीतिक जीवनमा उनले मलेसिया, ओमन र स्वीडेनमा बङ्गलादेशका राजदूतको जिम्मेवारी सम्हालेका थिए भने क्वालालम्पुर, काठमाडौँ, याङ्गुन र वासिङ्टन डिसीमा पनि कूटनीतिज्ञका रूपमा काम गरिसकेका छन् ।
यसैबीच सार्कको १६औँ महासचिवमा भुटानका तासो सोनाम तोब्गे नियुक्त भएका छन् । परराष्ट्र मन्त्रालयका अनुसार उनी छिट्टै काठमाडौँ आउनेछन् । सार्क सचिवालयमा वर्णानुक्रमका आधारमा नेतृत्व गर्ने परम्परा छ । यसअनुसार नयाँ महासचिव सिफारिस गर्ने पालो अफगानिस्तानको थियो । तर अफगानिस्तानमा आएको तालिबानी सरकारलाई सार्कका सदस्य राष्ट्रहरूले अझै मान्यता नदिएकाले यसअघि बङ्गलादेशले अवसर पाएको थियो । अहिले पनि अफगानिस्तानलाई जिम्मेवारी नदिई भुटानलाई दिइएको छ ।
