काठमाडौं । सर्वोच्च अदालतको सबै न्यायाधीश सहभागी हुने पूर्ण बैठकमा इनम सापकोटासँग जोडिएको विवादले शुक्रबार प्रवेश पायो। सापकोटाको मोबाइलमा भेटिएका सन्देशमा न्यायाधीशहरूको नाम देखिएको विषयमा बैठकमा छलफल भएको हो।
बैठकमा सापकोटाले प्रधानन्यायाधीश डा. मनोज शर्माको नाम लिएको र न्यायाधीश हरि फुयालसँग उनको भेट भएको विषय उठेको थियो। उपस्थित न्यायाधीशहरूले ती विषयमा प्रश्न उठाएपछि प्रधानन्यायाधीश शर्मा र न्यायाधीश फुयालले आ-आफ्नो कुरा राखेका थिए।
विवरण बाहिर आइसकेपछि यस विषयमा न्यायपालिकाभित्रै अध्ययन गर्ने समिति बनाउनुपर्ने सुझाव न्यायाधीशहरूले दिए। तर सर्वोच्चकी वरिष्ठतम् न्यायाधीश सपना प्रधान मल्ल विदेश भ्रमणमा र न्यायाधीश अब्दुल अजीज मुसलमान बिदामा रहेकाले विस्तृत छलफल सोमबारका लागि सारिएको छ।
एक न्यायाधीशका अनुसार सोमबार सबै न्यायाधीश उपस्थित भएपछि फूलकोर्ट पुनः बस्नेछ र यस विषयमा विस्तृत छलफल हुनेछ।
