चीनसँग जोडिएका नेपालका उत्तरी नाकाहरू खुल्न अझै ढिलाइ भइरहेको छ। भदौ १० मा भोटेकोशी नदीमा आएको बाढीले रसुवागढी नाका बन्द भयो भने मुस्ताङको कोरला नाका असोज ९ मा परेको पानीले अवरुद्ध भएको थियो। बाँकी रहेको तातोपानी नाका पनि तत्कालै सञ्चालनमा आउने अवस्था देखिएको छैन। दसैँको बेला तीन दिनका लागि खुलेको तातोपानी नाका अहिले पुनः बन्द भएको छ। त्यो नाका कहिले खुल्छ भन्ने टुङ्गो छैन। सिन्धुपाल्चोकका सहायक प्रमुख जिल्ला अधिकारी कृष्णप्रसाद शर्माले कोदारी (इको) पहिरो गएको ठाउँमा चिनियाँ पक्षले काम गरिरहेकाले अहिले नाका सञ्चालनमा नरहेको बताउनुभयो। गत असोज १२ गते परराष्ट्र मन्त्रालयका सहसचिव रामकाजी खड्काको नेतृत्वमा नेपालस्थित चिनियाँ दूतावाससहितको टोलीले तातोपानीतर्फको सडक स्थलगत अवलोकन गरेको थियो। त्यसपछि कात्तिक १ गतेदेखि ३ गतेसम्म तीन दिन नाका सञ्चालनमा आएको थियो। त्यसपछि पुनः बन्द भएको छ। चीन पक्षले सो सडक मर्मत गरिरहेको छ। मर्मतको काम कहिले सकिन्छ भन्ने प्रस्ट नभएको तर नाका खुलाउने पहल नेपालको पक्षबाट भइरहेको जानकारी दिइएको छ। चीनले यसअघि कोरला नाका सञ्चालनमा आएपछि तातोपानी नाका पनि सञ्चालनमा ल्याउने भन्दै आएको थियो। कोरला नाका सञ्चालनमा आइसके पनि तातोपानी नाका खोल्ने सम्भावना अझै देखिएको छैन। मुस्ताङका प्रमुख जिल्ला अधिकारी परशुराम पोखरेलले कोरला नाका सञ्चालनमा रहेको बताउनुभयो। असोज ९ गते भएको वर्षाका कारण केही समय बन्द रहेको नाका हाल सञ्चालनमा रहेको उनको भनाइ छ। सो नाका हुँदै चीनबाट धमाधम सामान आइरहेको जानकारी दिँदै उनले भन्सारको काममा कुनै रोकावट नरहेको बताउनुभयो। अध्यागमन विभागका महानिर्देशक रामचन्द्र तिवारीले भने नाकामा अध्यागमनका लागि चाहिने पूर्वाधार नभएकाले त्यसको काम तल लोमानथाङबाट भइरहेको बताउनुभयो। नाकामा न बिजुली छ, न इन्टरनेट छ।