बुटवल — नेपाली कांग्रेसको पन्ध्रौं महाधिवेशनको क्रममा रुपन्देही क्षेत्र नम्बर ५ मा सम्पन्न क्षेत्रीय अधिवेशनले कमलप्रसाद भुसाललाई सभापति चुनेको छ। देउवा पक्षको उक्त अधिवेशन लुम्बिनीको पर्सा चोकस्थित बुद्धमाया होटल प्यालेसमा सम्पन्न भएको हो। अधिवेशनले भुसालको नेतृत्वमा नयाँ क्षेत्रीय कार्यसमिति पनि चयन गरेको छ।
अधिवेशनको उद्घाटन समारोहमा दामोदर भुसाल प्रमुख अतिथिका रूपमा उपस्थित थिए। कार्यक्रममा युवा नेता विष्णु पोखरेल, लुम्बिनी अञ्चल सहसंयोजक लीला कुमारी पौडेल, युवा नेता आशिष शर्मा, पूर्वप्रदेशसभा सदस्य रमा अर्याल र क्षेत्र नम्बर ५ का सहसंयोजक गुनाखर पोखरेललगायत नेताहरू सहभागी भएका थिए।
अधिवेशनमा बोलेका नेताहरूले संगठनलाई बलियो बनाउनुपर्ने, पार्टीभित्रको लोकतान्त्रिक अभ्यासलाई अझ सुदृढ गर्नुपर्ने र नेता तथा कार्यकर्ताबीच एकता र सहकार्य अपरिहार्य रहेको बताएका थिए। उनीहरूले पार्टीलाई जनतासँग थप नजिक पुर्याउँदै जनताका समस्या, आवश्यकता र अपेक्षालाई सम्बोधन गर्नुपर्नेमा जोड दिएका थिए।
नवनिर्वाचित सभापति भुसालको नेतृत्वमा क्षेत्रीय कार्यसमितिले संगठन विस्तार र कार्यकर्ता परिचालनमा सक्रिय भूमिका खेल्ने अपेक्षा गरिएको छ।
