शुक्रबार अपराह्नदेखि परेको अविरल वर्षाले म्याग्दीका दुई प्रमुख सडक बन्द भएका छन्। वर्षासँगै विभिन्न स्थानमा पहिरो खसेपछि बेनी–जोमसोम र बेनी–दरवाङ सडक आज बिहानदेखि अवरुद्ध भएका हुन्।
जिल्ला प्रशासन कार्यालयका अनुसार बेनी नगरपालिका र मङ्गला गाउँपालिकाको सिमानामा पर्ने फापरखेतमा खसेको पहिरोले बेनी–दरवाङ सडक थुनिएको छ। त्यस्तै सिरुवारी र खामभित्तालगायतका स्थानमा खसेको पहिरोका कारण बेनी–जोमसोम सडक पनि बन्द भएको छ।
पहिरोले सडक अवरुद्ध भएपछि दुवै सडक भएर हुने आवतजावत ठप्प भएको छ। मुस्ताङतर्फ जाने र दरवाङ क्षेत्रतर्फ जाने यात्रु तथा सवारीसाधन प्रभावित भएका छन्।
झरी नरोकिएकाले सडक खुलाउने प्रयास सफल हुन सकेको छैन। सडक विभाग र पूर्वाधार विकास कार्यालयले पहिरो पन्छाएर सडक सञ्चालनमा ल्याउने प्रयास गरिरहे पनि वर्षा जारी रहेकाले काममा कठिनाइ भइरहेको प्रशासनले जनाएको छ। वर्षा नरोकिएसम्म सडक खुलाउन कठिन हुने देखिएको छ।
